Ele Zimbabwe kubikwa ukuba selisehluleka ukwemba amadayimana kusetshenziswa inkampani kahulumende kulandela ukuthathelwa amacence okwemba amankampani azimele wodwa. Kukhanya ukuthi imali yama dayimana kayisangeni ngemfanelo esikhwameni sikahulumende.
Nyakenye ngoNkwenkwezi kungene imali eyedlula kancane isigidi samadola eMelika - $1,1 million - esikhwameni sikahulumende.
Imali le ilethwe yinkampani kahulumende iZimbabwe Consolidated Diamond Company ebunjwe nyakomunye elabaqondisi abaxotshwayo ngenxa yokwethulela uhulumende amanga amangalisayo ngokwembiwa kwama dayimana eChiyadzwa esabelweni seManicaland.
Abaqondisi laba babethe uhulumende ulakho ukuthola izigidi ezingamatshumi amabili lanhlanu - $25 million – nyangazonke ekwenjiweni kwama dayimana.
Kodwa-ke kukhanya engani umthambo wamadayimana usuwomile kulandela ukuvalwa kwamankampani anjenge Anjin Investments yakwele China, Mbada Diamonds, Jinan lamanye afanayo.
Umqondisi weEmployers Confederation of Zimbabwe, uMnu. Busisa Moyo, uthi akwaziwa ukuba kwenziwani eChiyadzwa.
UMoyo uthi akulabufakazi ukuba amadayimana la atshontshwa yiziphathamandla zikahulumende.
Kodwa-ke uMnu. Bulisani Moyo, ingcwethi kwezenotho, uthi kulabantu abatshontsha amadayimana okumangalisayo.
Uthi okuhluphayo yikuthi amadayimana ayesembiwa eChiyadwa ayedojwa kulokuthi agejwe emhlabathini.
UNcube uthi akulamali yokugebha amadayimana la ngoba uhulumende kalamali.
Uthi kwakumele uhulumende asebenzise imali yamadayimana adojwayo abizwa ngokuthi ngama alluvial diamonds ukwenzela ukugebha akatshana phansi emhlabathini.
UMnu. Joseph Tshuma, omele iPelandaba-Mpopoma edale lephalamende ekubandla le Zanu PF, uthi kunzima ukugebha amadayimana aphansi kakhulu emhlabathini.
Uphinde wathi akulaqiniso lokuthi amadayimana ayatshontshwa yiziphathamandla zikahulumende.
Akwaziwa ukuba inkampani kahulumende izakwenelisa ukuba ilethele ukulumende imali kulandela imbiko yokuthi kwanyamalala imali yamadayimana edlula amabhiliyoni alitshumi lanhlanu - $15 billion.
