Ibandla leZanu PF seliqalisile umhlangano walo omkhulu oweAnnual People’s Conference.
Amalunga edale lePolitburo athe gwaqa eHarare ngoLwesibili lapho ahlafune khona okubhekane lezizalwane zeZimabbwe, ikakhulu isimo esibi somnotho welizwe.
Idale leZanu PF eleCentral Committee likhangelelwe ukwenza umhlangano ofanayo ngoLwesithathu lapho okuzakhangelwa khona izinqumo ezizathathwa lidale lePolitiburo lokunye okubhekane leZimbabwe.
Konke lokhu kusenzakala, kukhanya engani amalungiselelo omhlangano lo, ozakwenzelwa eMasvingo, asekuzinga eliphezulu ngoba sokulungiswe lendawo lapho okuzabe kulabantu abedlula inkulungwane eziyisithupha lamakhulu amahlanu – 6,700.
Ukuze sizwe okunengi ngalokhu, iStudio 7 ixoxe loMnu. Joseph Tshuma, olilunga ledale leCentral Committee njalo omele iPelandaba-Mpopoma edale lephalamende, othe amalungiselelo omhlangano lo aqhubekela phambili ngemfanelo.
“Into zonke zikhanya sezilungile lalabo akade besenza ngesiKhiwa okuthiwa yi-accreditation sokwenziwe. Ngikhuluma nje sokuqalile umhlangano wePolitiburo ozalandelwa kusasa ngowethu owe Central Committee … Sizahlangana-ke ngobunengi bethu eMasvingo ngoLwesine lapho okuzabe kulamalunga amanengi ebandla lethu.”
UTshuma emhlanganweni lo kuzakhulunywa okunengi okuhambelana lesimo esibi somnotho welizwe njalo langabantu abakuhulumende abaphikisa inhlelo ezinengi ezisungulwa nguhulumende.
Ibandla leli likhangelelwe ukuthi lizahlaba inkomo ezedlula amatshumi amahlanu lasitshiyangalombili, kudliwe lokudla okumangalisayo eMasvingo.
