Lokhu sekudale ukuthi abahlali bakulezindawo bathi ngabe uhulumende uyangenela ekuthengisweni kwamacimbi ukuze kube lentengo ebekiweyo.
Kusukela kumaviki amabili adlulileyo amapulazi abalisa ele Tshindeni lele Timber Farm aseduzane ledolobho leGwanda kanye lele Dip 4 eCollen Bawn ahlaselwe ngabantu abavela endaweni ezitshiyeneyo zelizwe abalande ukuzogola amacimbi.
Loba nje okwakathesi amacimbi emalutshwane ukwedlula ngoMbimbitho wanyakenye lokhu akuzange kwamisa abantu abasuka empumalanga kwelizwe ukuza eGwanda ukuzowagola.
ETshideni sihlangane lojaha osakhulayo uAlleta Nyathi yena osilandisela ngokubanjwa kwamacimbi.
Uyengezelele wathi okwakathesi uSobhuku wabo ubisele muva abantu abakade bezogola amacimbi ngoba emalutshwane.
Lapho sifika eDip 4 sithole UNkosazana Varaidzo Mkwazura osuka eMwenenzi eWelkom othe uzogola amacimbi okuthi athengise aziphilise lemuli yakhe.
UMnu. Ronald Ncube ohlala eDip 4 uthi abantu babuye ngobunengi ukuzodinga amacimbi besuka endaweni ezitshiyeneyo zelizwe, kodwa ukhala ngentengo.
Omunye okhale ngentengo ephansi yamacimbi nguNkosazana Sakhile Ndlovu othi lintengo kumele iqonge ngoba kulomsebenzi omkhulu ukugola Amacimbi.
UMnu. Raymond Mauba ngusomabhizimusi njalo ngumqondisi wenhlanganiso yeGwanda Cultural Artifects Association, uthi kuyadingeka ukuthi uhulumende afake imigoqo ekubanjweni lekuthengisweni kwamacimbi ukuze labo abahlala lapho atholakala khona benelise ukuziphilisa ngayo.
NgoMbimbitho wanyakenye ka 2017, kwaba lamacimbi abanengi kakhulu esigabeni sangezansi yeMandebeleni okwadala ukuthi abanengi bacabange ukuthi ayehlola.
