Umbukiso weZimbabwe International Trade Fair uqale ngoLwesibili koBulawayo lapho osomabhizimusi abazabe bekhulumisana ngokusebenza ndawonye okwamalanga amabili.
Abantu abafisa ukubuka impahla bazavunyelwa ukungena embukisweni lo kusukela ngoLwesine.
Umbukiso weZITF wamatshumi ayisithupha (60) oweZimbabwe International Trade Fair wenziwa ngaphansi kwesihloko esithi ‘Propagating Industrial Growth Through Trade and Investment’.
UMqondisi wenkampani yeZITF, uMnu. Nicholas Ndebele, uthi uhamba kahle umbukiso lo.
"Umbukiso usuqalile uhamba kahle kakhulu. Siyathokoza ngokuza kwabantu abazobukisa. Abantu bonke abazobukisa sebelapha abasuka kumabhizimusi ayehlukeneyo, sijabulile ngokuza kwabantu."
Obukisa eZITF, uMnu Zondani Phiri, uthi bakhangelele ukuthola abathengi abasuka kwamanye amazwe njenganyakenye.
“Sikhangelele ukuthola amathuba okuthengisa kwamanye amazwe impahla yethu, sithengisela eSouth Africa Zambia leAngola.”
UNkosazana Munchitho Mudimba, osuka eBinga ozobukisa imisebenzi yezandla, uthi ubukisa impahla enengi.
“Sisuka eBinga sizelapha lengcebethu zethu lesepa, size lapha sisekelwa yiZim Trade, umbukiso uhamba kahle."
UNkosikazi Lindiwe Nyoni, isikhulumeli sekolitshi yemfundo yaphezulu iNational University of Science and Technoloy, uthi bazobukisa imisebenzi yekolitshi leli.
“Silapha eZITF siphiwe ithuba lokuzotshengisa umhlaba uphenyo olungancedisa indingeko ezehlukeneyo kumphakathi ekuthuthukiseni indawo ezehlukeneyo sinxusa wonke umuntu ukuba azebuka imisebenzi yabafundi. Umbukiso muhle kakhulu."
Amankampani edlula amakhulu amahlanu - 532 aweZimbabwe ayabukisa kuthi amazwe alitshumi lambili agoqela eleBostwana, Ethopia, Japan, Kenya, Malawi, Mozambique, Namibia, Nigeria, South Africa, United Arab Emirites, United States of America leZambia ayabukisa lonyaka.
UMongameli Yoweri Museveni wakwele Uganda ukhangelelwe ukuthi ngoLwesihlanu uzavula okusemthethweni umbukiso walonyaka owe ZITF 2019.
NgoLwesithathu inkampani yeZITF izaqhuba umhlangano labosomabhizimusi ozakhokhelwa ngumsekeli kamongameli welizwe uRetired General Constantino Chiwenga.
