Abenhlanganiso eyeNational Democratic Working Group (NDWG) bathi akubethusi ukwethusela kwabe Zanu-PF lohulumende ngombiko womgcinisihlalo walinhlanganiso uMnu Job Sikhala.
USikhala wethule umbiko wakhe emhlanganweni wamazwe womhlaba phansi kwenhlanganiso eyeUnited Nations okukhangela ngezamalungelo oluntu, oqhutshelwe eGeneva eSwitzerland mhlaka 15 wayonalinyanga.
Uthe uhulumende kaMongameli Emmerson Mnangagwa ubusa ngenkani ngakho-ke kumele asuswe embusweni.
Okhokhela ezombusazwe kulinhlanganiso, uMnu. Wurayayi Zembe utshele intathelizindaba ukuthi ukwethusela kwabe Zanu PF abathi uSikhala ulakho ukubotshwa mayelana lakukhulume kuleyondawo akumangalisi.
Uthi kuyamangalisa ukwethusela okwenziwe ngumabhalane omkhulu wohlangothi lukahulumende olubona ngokwethulwa kwemibiko uMnu Nick Mangwana kanye lomphathintambo wesabelo seMidlands uMnu Owen Ncube.
Okhokhela uhlangothi lwabatsha kunhlanganiso yeNDWG uComfort Mpofu utshele iStudio7 ukuthi uSikala laye akala kwesaba njalo uzaphenduka elizweni nxa esehlolwe okugcweleyo ngodokotela.
Kodwa okhokhela amalunga ebandla leZanu-PF ephalamende uMnu Pupurai Togarepi utshele iStudio7 ukuthi uSikhala usephelile njalo akulasidingo sokuzihlupha ngaye.
Forum