Ngempela batsho beqinisile abadala lapho bethi umntwana ongakhaliyo ufela embelekweni. Osakhulayo uSibongiseni Mthombeni oweSilikwe oleminyaka yokuzalwa elitshumi lasikhombisa uthinthe inhliziyo zabanengi lapho esehlisa ezimathonsi inyembezi elandisa ngobuhlungu bokubanjwa ngamandla ukutshiya isikolo ngoba engelayo incwadi yokuzalwa ibirth certificate.
USibongiseni wabhujelwa ngunina lapho ebelethwa kwathi uyise wahamba eGoli wanyamalala.Kuthe kufika isikhathi sokuthi athathe ibirth certificate komsitheli bathi bafuna ideath certificate kanina yona eyayingekho okwadala ukuthi engayiphiwa lincwadi.
Ngemva kokuba iStudio 7 yethule udaba lwakhe bakhona abalaleli abathinthekayo bamsiza uSibongiseni wathola ibirth certificate kanye le sithupha ngemva kwamalanga alitshumi. Simthole ejabula okumangalisayo lapho sifika kibo eSilikwe.
“Ngijabule kakhulu lami ngemva kokubana sengithole ibirth certificate ngoba bengingeselalo ithemba lokuthi ngizafa ngayithola, okwakathesi ngifisa ukubuyela esikolo lami ngifunde ngiqhubekele phambili ngifunde ngipase ngibe ngudokotela.Ngiyabonga kakhulu kulabo abathe bangincedisa ukuba ngithole ibirth certificate Inkosi ilibusise”.
Uyisekazi, uNkosikazi Siphathisiwe Nkala laye uveze ukujabula okukhulu kodwa waphanga wathi lokhu kulobunzima obukhulu ekutholeni lezincwadi koMsitheli.
“Ekubongeni kwami ngibonga kakhulu abantu abangincedisayo abantu abafana leCYDT loStudio 7 labobonke abakwanise ukuthi bangenele kuloludaba bangincedise,engikukhangeleleyo yikuthi lumntwana abuyele esikolo ngoba efisa ukuthi abuyele esikolo kodwa izandla zami zimfitshane angingeke ngathi kulula ngoba mina sengiphumumile kuloludubo ubunzima bukhona eregistry”.
UMnu. Phineas Maphosa ukhansila weNtepe uthi udubo lwabantwana abangela mabirth certificates lusabalele kulesisigaba njalo inengi labo ngabazukulu abahlala labokhulu labogogo. Uthi ngaphandle kokuthi kuguqulwe eminye imithetho yokuthola lezincwadi loludubo luzahlala lukhona.
“Sifiso ukuthi nga amahofisi anikeza izincwadi lezi akhulule eminye imithetho Leyte eyokuthi ogogo labokhulu besiza labantwana ma bengabawomiseli kababavumele babanikeze.Ngoba umntwana oyinzalo yeZimbabwe kumele akholise ukukhululeka kwesizwe seZimbabwe esithi ngamarights njengabantwana bonke abalanazali labangela”
Kusenjalo uMgcinisihlalo wekomishini ebona ngokukhumisana umlotha eye National Peace and Reconcilliation Commission owayengumahluli uJustice Sello Nare uthi kuzamele labo ababulawa ngesikhathi sombhuqazwe weGukurahundi baphiwe amadeath certificates ukuze abantwababo bengabhekani lobunzima bokuthola amabirth certificates. UNare uthi bazaqala uhlelo lokungcwaba kutsha labo ababulawa bajikelwa emlindini.
“Kunjenge ndaba leyi eyamabirth certificates lama death certificate kulandelwa abanye bafuna ukukhetha ukuthi kube lama exhumations abantu babo lapho abalele khona ngiyathemba lokhu nxa kuhambe kuhle siyakuqalisa mhla ka27 koSiphepha lapho okuyafikwa kuvulwe ithuna liseduzane lesporo kukhanya ukuthi izulu lingana amathambo sebonakala abonalabo abalele kuleyondawo”.
UNare uveze njalo ukuthi imbiko eyakhitshwa ngamakomishini kaDumbutshena loChihambakwe awahlolisisa ngombhuqazwe weGukurahundi anyamalele ezandleni zowayenguMongameli uMnu Robert Mugabe.
“Sengenze imizamo eminengi ukuthi avumbuluke kulobunzima nyana, sike sakhulumisana loVice President uMohadi ukuthi kukhulunyiswane ngakho ulokhe esadinga ukuthi angaphi njengokwazi kwenu abephethwe yisigaba esikababa uMugabe ngalesosikhathi, balokhu besawadingisisa”.
UNare uthi bazaqala ukungena emaphandleni ukuyakhulumisana lezakhamizi njalo ukhuthaza uzulu ukuthi akhulume ngaloludaba lweGukurahundi engelakuthandabuza kumbe ukwesaba.
Kumaviki amabili edluleyo umongameli Emmerson Mnangagwa wethule umbiko othi udaba lweGukurahundi kumele lukhulunywe mgceke lenhlupo zonke zabathinteka ngobhuqhazwe lo, inengi elilokhu lihlutshwa yibunzima ngokuthola incwadi zokuzalwa lezithupha.
