Icele lebandla leCitizens Coalition for Change elikhokhelwa nguSikhwicamfundo Welshman Ncube labanye ababili lithi lizavimba bonke abazazama ukuncintisa kukhetho lwama by-elections oluzayo besithi baphansi kwebandla leli.
UMnu. Sengezo Tshabangu, ozithi ungunobhala jikelele webandla leCCC, uthi lokhu kugoqela abakucele elikhokhelwa nguMnu. Jameson Timba.
UTshabangu uthi kumele bethule zwi bonke abalokhu besithi bakucele lika Timba ngoba uzabahambisa emthethwandaba bengazingenisa kukhetho oluzayo.
Uthi kabavunyelwa njalo ukusebenzisa ubuso buka Chamisa lakho konke okuphansi kwebandla leCCC.
Kasenelisang ukukhuluma ngodaba lolu loMnu. Promise Mkhwanazi isikhulumeli secele leCCC elikhokhelwa nguTimba ngoba ubengaphenduli umakhalekhukhwini.
Kubandla leZanu PF, obona ngenhlelo zokukhankasela ibandla leli emphakathini uMnu. Mike Bimha utshele intathelizindaba ukuba uMnu. Kiven Mutimbanyoka (Harare East) loMnu. George Mashavane (Mt. Pleasant) banqobe abathathu akade bencintisa kukhetho lolu.
Uthi sokumele ababili balungiselele okuyaphanyeka amagama abo eNomination Court ngoLwesibili.
Izikhundla lezi zedale lephalamende zabakhona kulandela ukusuka kwamalunga eCCC uNkosazana Fadzai Mahere eMount Pleseant loMnu. Rusty Markham eHarare East abathi balandela uMnu. Nelson Chamisa owatshiya ibandla leli esithi selihluthunwe nguMongameli Emmerson Mnangagwa labanye bakhe.
Abakubandla leZanu PF, abagoqela uMnu. Joseph Tshuma osanda kunqoba kukhetho lwama by-elections ePelandaba Mpopoma, uthi kuqakatheke kakhulu ukuthi kuqhutshwe ama-byelections ayiwo aveza ukuba basekelwa kakhulu nguzulu.
Forum