Owayemela isigaba seZengeza West edale lePhalamende elilunga leCCC uMnu. Job Sikhala, obesehlale entilongweni okweminyaka phose emibili, uze wakhululwa ngumthethwandaba namuhla ngemva kokuba umantshi ebeke eceleni isigwebo sakhe sokuthi apike okweminyaka emibili kulandela ukokutholakala kwakhe elecala lokutshotshozela udlakela eNyatsime ndawonye lomunye wakhe uMnu Godfrey Sithole, owayemela iChitungwiza.
Esethula isinqumo sakhe, umantshi uNkosikazi Tafadzwa Miti uthe uSikhala loSithole bazapika okweminyaka emibili. Kodwa uphange wabeka isigwebo lesi eceleni ngoba esithi uSikhala usehlale isikhathi eside evalelwe, eChikurubi Maximum Prison lanxa nje ebengakatholakali elecala.
Ngokunjalo, uthe ababili laba kumele bakhululwe, kodwa uxwayise uSikhala ukuthi akumelanga edale icala elifanayo phakathi kweminyaka emihlanu elandelayo. Lokhu kutsho ukuba uSikhala uzaphula eChikurubi esesiya ngekhaya namuhla kumbe kusasa ekuseni ngemva kokuvalelwa okweminyaka phose emibili, 1 year, eight months.
USikhala loSithole babotshwe ngomnyaka ka2022 besetheswa icala lokutshotshozela udlakela kulandela ukubulawa kwelunga lebandla labo uNkosikzi Moreblessing Ali lilunga leZanu PF uPius Jamba Mutandi eNyatsime. Batholakale belecala leli ngeviki edluleyo.
Elinye lamagqwetha kaSikhala, uMnu. Harrison Nkomo uchasise okunengi.
“Uphiwe isigwebo seminyaka emibili kodwa siphinde sesulwa okweminyaka emihlanu elandelayo, kuthiwa kakumela enze elinye icala lokutshotshozela udlakela. Lokhu kutsho ukuba usekhululiwe. Lolu yilo lodwa udaba olube lusenza ukuba ehlala ejele.”
UNkomo uthe ukuvalelwa kukaSikhala okwesikhathi sonke lesi encitshwa ithuba lokukhululwa ngemali yesibambiso, i-bail, yinto embi kakhulu, esithi abatshutshisi bamethesa icala elingekhoyo.
Uthe lanxa uSikhala esekhululwe, bazaphikisa ukutholakala kwakhe elecala kanye lesigwebo asethesiweyo lanxa nje sibekwe eceleni.
Phandle komthethwandaba kamantshi eRotten Row bekugcwele abantu behlabela bejabulela ukukhululwa kukaSikhala.
Omunye wabo ngu Mnu Comfort Ncekuyenkosi owenhlanganiso ye Job Sikhala Solidarity Movement.
“Silokujabula okukhulu ukuthi usephumile. Kwakungamelanga ebe evalelwe. Umele uzulu wonke. Sime laye waze wakhululwa. Sifuna ukuthi icala leli lesulwe lonke.”
Ocubungula ezombusazwe ekubandla lePeople’s Unity Party (PUP) uMnu Hebert Chamuka uthi kukhona okunuka santungwana ngendlela uSikhala akhululwe ngayo ngesikhathi kulengxabangxoza ebandleni leCCC.
“Ukuphuma kuka Sikhala kuveza ukuba kungabe kukhona okungamanga kuhle ngoba kungani bemhkhiphe namhlanje uChamisa esesukile esekhundleni sakhe. Kusobala ukuba kukhona okutshaya amanzi.”
Kodwa ilunga leZANU PF, uMnu Elijah Gumbo uthi okwenzakale namhlanje kuveza ukusebenza kuhle kwemithethwandaba yeZimbabwe.
“Ukukhululwa kwakhe kuveza ukuba inkantolo kuleli ikhululeke kakhulu. Labo abathi kayikhululekanga bakubonile namhlanje ngokukhululwa kuka Sikhala.”
Lanxa esekhululwe uSikhala usesele lamanye amacala agoqela elokuthi wakhuluma amanga enkundleni yeFacebook kanye lelokutshotshozela udlakela endawonye lowayengu sodolobho weChitungwiza uMnu Lovemore Maiko.
Uzaphenduka emthethwandaba mhlaka 7 Nhlolanja ngenyanga ezayo esethoniswa esuka ngekhaya.
Forum