UMongameli Donald Trump lokhu engavumi ukuthi unqotshiwe kukhetho olwenziwa ngeviki ephelileyo ngowayengumsekeli kamongameli, uMnu. Joseph Biden, oselungiselela ukungena esikhundleni sikamongameli loba evinjwa nguTrump.
UBiden, osekhethe uMnu. Ron Klain ukuba ngumcebisi wakhe omkhulu, uChief of Staff, uqhubekela phambili elungiselela ukungena esikhundleni sikamongameli.
Okwamanje ulama electoral votes adlula amakhulu amabili lamatshumi ayisikhombisa – 279 kuthi uTrump ulangamakhulu amabili letshumi lasikhombisa – 217.
Onqoba kukhetho lukamongameli eMelika kumele abelama electoral votes angamakhulu amabili lamatshumi ayisikhombisa – 270.
Abasekela uBiden bathi uTrump kavume ukuthi unqotshiwe. Omunye wabalombono lo nguSenator Chris Murphy, okubandla lama Democrats.
Kodwa abasekela uTrump bathi ulelungelo lokudingisisa okwenzakala kukhetho lolu. USenator Mitch McConnell, uthi kuqondile okwenziwa nguTrump.
Ophethe uhlangothi lukahulumende olubona ngokudlelana lamanye amazwe, uMnu. Mike Popeo, uthi uTrump uzabuyela esikhundleni sikamongameli.
Kodwa uBiden uthi abantu laba kabakwazi abakukhulumayo.
UTrump usehambise emthethwandaba udaba lokhetho lolu kodwa kukhanya inkantolo ezabelweni ezitshiyeneyo zisithi akulacala elibonakala kulokhu okwethula libandla lama Republicans.
UMnu. Busani Mbuso Ntini, olandela ezombangazwe ekwele Melika, uthi kuyamangalisa okwenziwa nguTrump.
Omunye njalo olandela okwenzakala eMelika, uMnu. Mcedisi Ncube, uthi kumele luphumelele ukhetho lweMelika
Okwamanje ezinye izabelo ezinjenge Georgia seziqalisile ukubala kutsha amavoti kusenzelwa ukuthi kungabi lokuthandabuza kwempumela yokhetho lolu.
