UMongameli Donald Trump uqhubekela phambili esithi waqilwa kukhetho ulusanda kwenziwa loba uMnu. Joseph Biden, okubandla lama Democrats, esethole amaElectoral Votes eneleyo ukuba angene esikhundleni sikamongameli.
UTrump, othi ufuna kuguqulwe impumela yokhetho endaweni anqotshwa khona nguBiden, utshele abalandeli bebandla lama Republicans izolo eGeorgia ukuba ukhetho alwenziwanga ngemfanelo.
Ubekhankasela abafisa ukungena edale leSenate abamele ibandla lakhe abangqikilana kukhetho lebandla lama Democrats ngoZibandlela.
Kwaba ngutshiki lobhanqa kukhetho olwenziwa ngoLwezi esabelweni uTrump owabhuqwa nguBiden. Imithethwandaba yalile endaweni ezinengi ukuvumla uTrump ukuba aguqule impumela yokhetho okungekho emthethweni.
Olandela ezombangazwe ezimele yedwa, uMnu, Busani Mbuso Ntini, uthi abakhetha umongameli kulandela ukuqhutshwa kokhetho sebezahlala phansi bavote ngemfanelo.
UNkosazana Busi Masina, ohlala eMagwegwe koBulawayo, uthi kusobala ukuba uTrump wanqotshwa kukhetho lukamongameli.
UMnu. Sikhumbuzo Mlalazi, osekela uTrump, uthi loba ezaphuma esikhundleni uTrump, ufundise abantu ukuzilwela.
UBiden, osekhethe amanye amalunga edale leCabinet yakhe labanye, uselungiselela ukungena esikhundleni sikamongameli. Kukhangelelwe ukuthi uzaguqula okunengi okwenziwa nguTrump okunjengodaba lwabantu bokuza.
UTrump wayevimba abantu bokuza ngendlela ezitshiyeneyo ezigoqela ukwakha umgcele owehlukanisa ilizwe leMelika lele Mexico.
