Umsekeli kamongameli wakwele Melika, uNkosikazi Kamala Harris, uthi kuqakathekile ukuba amazwe wonke abelombuso okhululekileyo ukwenzela ukuthi uzulu azibuse njalo athuthuke ngemfanelo.
UNkosikazi Harris wethule lokhu izolo ntambama ngesikhathi egqiba umhlangano wakuqala oweSummit for Democracy oqoqwe enkundleni zokuxhumana nguhulumende wakele Melika.
“Okwamanje bakhona abafuna kungabi lombuso okhululekileyo. Phakathi kweminyaka elitshumi lanhlanu edluleyo, kukhanya engani ubugugudeka umbuso kazulu. Abancindezeli emhlabeni wonke jikelele bafuna uphele umbuso kazulu.
“Sokugcwele lobukhohlakali lokwephulwa kwelungelo loluntu okuyinto engahambelani lombuso kazulu. Ngesikhathi esifanayo kulabanye abesethula imibiko yamanga eyenga abanye abantu. Siyakhumbula okwenzakala eMelika mhlaka 6 ngoZibandlela.”
Uphinde wathi banengi abantu emhlabeni wonke jikelele abangafuni kube lombuso kazulu.
“Ngesikhathi sizama ukuvimba ukubhidlizwa kombuso kazulu, kumele sikhumbule ukuthi ukuba lombuso okhululekileyo kwenziwa ngabantu hatshi ukuthi yinto nje ecatshangelwayo. Kumele sidonse kanyekanye ukwenzela ukuthi abantu bazibuse.”
UMnu. Phithizela Ngcobo, odabuka eZimbabwe ohlala kwele Melika, uthi uzulu ulakho ukwenza kube lombuso ofiswa nguNkosiakzi Harris.
EleZimbabwe kalinxuswanga emhlanganweni lo okulamazwe agoqela eleBotswana, Malawi, Democratic Republic of Congo, Zambia, Nigeria, Namibia lamanye.
Bayakhala abakubandla leZanu PF abathi uBiden bekumele anxuse eleZimbabwe.
UMnu. Joseph Tshuma, okudale leZanu PF Central Committee, uthi uBiden bekumele abize umkhokheli welizwe leZimbabwe, obezangena umhlangano lo ngomabonakude njengabanye.
Umhlangano lo, ogqitshwa namuhla, ukhangelelwe ukuba uzaphuma lezinqumo ezimbalwa ezokuvuselela umbuso kazulu emazweni atshiyeneyo.
