Unkosikazi Sheffra Dzamara umka Itai Dzamara intathelizindaba eyathunjwa ngabantu abangaziwayo ekuqaleni kwawonalumnyaka uthi uyacela ngomusa kaThixo ukuthi abamthumbayo bamkhulule ukuze abuye azobona imuli yakhe okwamanje ekhathazekileyo.
UNkosikazi Dzamara wethule lesi sikhalazo eveza ubuhlungu abuzwayo, ngoLwesihlanu ngesikhathi sokufike inyanga eziyizikhombisa umkakhe uItai engabonakali, enyamalale mhlaka 9 Mbimbitho wonalumnyaka.
UMnu. Charles Nyoni omele inhlanganiso yeOccupy Africa Unity Square eyayikhokhelwa nguDzamara, ngenjongo yokutshengisela bekhuthaza umongameli Robert Mugabe akasuke embusweni ngoba esezehlulekela njalo eseluphele uthi kuyadanisa ukuthi sokulenyanga eziyisikhombisa uDzamara engabonakali.
UNyoni uthi kunje sebekubone ukuthi isikhathai sesiside uhulumende ekhanya engela ndaba lokudinga uDzamara ngakhoke sebecabanga ukuya emagqwetheni abo awe Zimbabwe Lawyers for Human Rights ukuthi abuyele emithethwandaba ukuze ibambe ngamandla amapholisa kahulumende ukuthi aqinise umsebenzi wokumdinga. Kumbe njalo nxa kuyikuthi balolwazi lalapho akhona babatshele njengoba ebikwa wathunjwa ngamadoda ayehamba ngemotha yohlobo oluvame ukusethenziswa zinsoli zikahulumende eze CIO.
IStudio 7 kayenelisanga ukukhuluma labamele uhulumende ukuze bachasise labo ukuthi mizamo bani abayenzayo ukudinga uDzamara nanku phela besetheswa umlandu wokungabi lendaba lokudinga ukuthi ungaphi.
