Umka mongameli welizwe uNkosikazi Auxillia Mnangagwa ubesedolobheni leGwanda ngoMgqibelo kumkhosi weFirst Lady Family Fun Day lapho ahlangane labanye abesifazana, njalo uthi ubhoda-bhoda elizweni ukuze azizwele ngokwakhe indubo abantu ababhekane lazo.
UNkosikazi Mnangagwa uvakatshele kwelezansi yemaNdebeleni kusukela ngoLwesihlanu lapho afike eHlangano Clinic eMzingwane kanye leNatisa Clinic eseMatobo.
Utshelwe yiziphathamandla zempilakahle ukuthi kulodubo lokusilela kwamaphilisi lemithi yabagulayo kulezindawo.
NgoMgqibelo uhlangane labesifazana emkhosini yokuzijabulela oqhutshelwe enkundleni yePelandaba Stadium eGwanda.
UNkosikazi Mnangagwa uqale ngokudobha ingcekeza njalo wakhuthaza umphakathi ukuthi ahlale endaweni ehlanzekileyo. Uthi ufuna ukusiza lapho enelisa khona.
UNkosikazi Mnangagwa uthe kubalulekile ukuthi abasefazana labo baphatheke emidlalweni ukuze balondoloze imizimba yabo njalo baphumuze lengqondo.
Ukhuthaze omama ukuthi bahlangane njalo nje ukuze baphume lamaqhinga azathuthukisa impilo zabo.
UNkosikazi Janet Ngwenya oleminyaka yokuzalwa engu 62 ngomunye walabo abagijimileyo wanqoba njalo uthi ulijabulele lelilanga.
Kusenjalo, abanye abafundi emaphandleni behlulekile ukuya esikolo lapho zivulwa kuliviki ngenxa yokuswelakala kwemali.Omunye umgundi weSitezi uthi ulokhu ezihlalele ekhaya.
UNkosikazi Josephine Majaha oyisakhamuzi seSitezi uthi babhekane lodubo olukhulu.
UNkosikazi Juliet Nkiwane umqondisi wenhlanganiso elwela amalungelo abesifazana eyeWomen Development Association of Zimbabwe uthi ulokwesabela ukuthi indlala ekhona izadala ukwanda kobudlwangudlangu kubomama.
Uhulumende usethembise ukuthi akulamuntu ngitsho loyedwa ozabulawa yindlala lonyaka. Utsho lokhu lanxa inengi labantu lingatholanga isivuno esithe xaxa.
