UNkosazana Marry Mubaiwa owayeyinkosikazi kamsekeli kamongameli uMnu. Constantino Chiwenga uvalelwe esitokisini ngoLwesibili kulandela isinqumo somthethwandaba esokuthi ahlolwe ngodokotela ababili engakathoniswa icala aletheswayo.
Umantshi uMnu. Lazini Ncube uthe uNkosazana Mubaiwa uzakuba sezandleni zesitokisi seHarare Remand Prison kulandela isicelo sabatshutshisi esokuthi ahlolwe ingqondo.
Lokhu kwenzakala udokotela wesibhedlela seParirenywatwa ethe kalungelanga ukumiswa phambi komthethwandaba athoniswe.
Elinye lamagqwetha akhe, uMnu. David Coltart utshele iStudio 7 ukuthi bayasola kakhulu lesi isinqumo.
UNkosazana Mubaiwa utshele intathelizindaba ukuthi udinga usekelo lwabesifazana kuloludaba, kanye lolomanyano wamazwe omhlaba olwe United Nations ukwenzela ukuthi abone abantwabakhe abathwa nguMnu. Chiwenga, yena osebenzisa amandla akhe kwezombusazwe.
Wetheswa amacala agoqela elokuzama ukubulala umyeni wakhe lelenkohlakalo.
Ukhangelelwe ukuhlolwa okwamalanga alitshumi, abuyele emthethwandaba mhlaka 26 kuyonale inyanga.