Abakhokheli bamabandla akuhulumende womanyano, abathi uMongameli Robert Mugabe, uMnu Arthur Mutambara loMnu Morgan Tsvangirai bazaphatheka emkhosini wokusungulwa kwemidlalo yeFifa Soccer World Cup eSouth Africa ngoLwesihlanu.
Abathathu laba bazamanyana lenkokheli yamazwe atshiyeneyo kulesi sehlakalo, esilethe injabulo enkulu eAfrica ngoba kungokwakuqala ukuthi iWorld Cup idlalelwe kuleli zwekazi.
Kulembiko ethi abathathu laba balakho ukuhlangana loMongameli Jacob Zuma bexoxisana ngokuhluphayo eZimbabwe ngesikhathi bekhonale eSouth Africa.
Omunye wabacebisi bakaZuma uNkosazana Lindiwe Zulu uthe ubengeke atsho okwamanje ukuthi uZuma uzahlangana labathathu laba na, kodwa uthe ukhona phakathi kwabo ocele uZuma ukuthi ahlangane labo bekhulumisane ngodaba lokungagcwaliswa kwesivumelwano seGlobal Political Agreement.
Obona ngokwenzakala ewofisini kaTsvangirai uMnu Gorden Moyo utshele uNtungamili Nkomo ukuthi kungabalithuba elihle kakhulu nxa uMongmeli Zuma engahlangana loMugabe, uTsvangirai loMutambara ngemva komkhosi wangoLwesihlanu behlaziya okuhluphayo kuhulumende.
Kusenjalo, Iqembu lenguqu elesouth africa i Bafana-Bafana lizadibana lele Mexico kusasa lapho kusungulwa umcintiswano wemidlalo yenkezo yeFIFA World Cup, njalo ngensukwana ezilandelayo i Argentina izadlala le Nigeria, kuthi iSerbia yona ingqikilane le Ghana. Kubikwa kulokujabula e South Africa, eZimbabwe kanye lemhlabeni jikelele kulindelwe imidlalo ye World Cup, njalo inengi lithemba ukuthi i South Africa izanqoba eleMexico.
Ukuze sizwe okunengi ngokuphathelane lemdlalo ye World Cup, uSithandekile Mhlanga we Studio 7 uxoxe lo Mnu. Zenzo Nkomo, ingcwethi ecubungula ezombusazwe, endawonye loMnu. Omega Sibanda, ingcwethi kwezemidlalo .
Imidlalo le yandulelwe yinkalakatha yegigi enkundleni ye Orlando Stadium eJohannesburg lapho okubhuqabuqana khona abaculi be Aafrica labamanye amazwekazi kukanti leli gigi libukelwa yizigidi zabantu emhlabeni jikelele. UBenedict Nhlapho uyalandisa.
