Uhulumende weleSouth Africa uthi amalungiselelo omhlangano wobudlelwano beChina lezwekazi leAfrica owe Forum for China-Africa Cooperation (FOCAC) asephelile.
Lumhlangano wamalanga amabili uqala ngoLwesihlanu eJohannesburg phansi kwesihloko esithi, ‘Ukuphumelela ndawonye kweChina leAfrica lokuthola okulinganayo kuntuthuko ezavela kulobu budlelwano.’
UMongameli Xi Jinping wakweleChina ufike izolo kweleSouth Africa ukuzongena lo umhlangano kanti inengi lenkokheli yamazwe eAfrica egoqela uMongameli Robert Mugabe ikhangelelwe ukuba khona emhlanganweni lo.
Lobanje kusasele amahola ambalwa ukuthi umhlangano we FOCAC uqale kweleSouth Africa, kulamazwe amabili asehle avuna okukhulu ebudlelwaneni beChina lamazwe eAfrica.
Ehambeni lwakhe lokuya emhlanganweni weFOCAC, uJinping udlule eZimbabwe lapho okulotshelwane khona izivumelwano ezilitshumi zokuthuthukisa umnotho welizwe. Lezi zivumelwano zibiza amadola angamabhiliyoni amane ezikhangelelwe ukuphathisa ekuvuseleleni umnotho weZimbabwe.
Kodwa eleSouth Africa kukhanya kuyilo elithole itshontsho elikhulu. Umongameli Zuma utshayele eleChina ihlombombe ngokukhuthaza ubudlelwano obungela ncindezelo.
Ilizwe lakhe ke lilobelane leleChina izivumelwano ezedlula amatshumi amabili.
UJinping yena usevele wakubeka kwacaca ukuthi ufuna ubudlelwano beChina leAfrica bukhule mihla yonke.
Ngesikhathi ke lumhlangano weFOCAC ususeduze lokuqala amehlo onke asebheke eleChina ukuthi lizawaphani amanye amazwe ezwekazi leAfrica. Lumhlangano ukhangelelwe ukwenza izivumelwano ezizalawula ubudlelwano beChina leAfrica.
Umcwaningi enhlanganisweni ye Centre for Study of Democracy eUniversity of Johannesburg, uMnumnzana Gideon Chitanga, uthi kusobala ukuthi amazwe eAfrica leChina bazimisele ukuvuselela ubudlelwano bantolontolo obaqala ngesikhathi soncindezelo lapho inengi lalamazwe asizwa ngeleChina.
Kodwake kakusibo bonke abantu abavumelana lenhloso yeChina ngalezi zivumelwano. Isizalwane seZimbabwe uNkosinathi Sibanda uthi kufanele la amazwe ananzelele ukuthi kuyini okufunwa yiChina ingakenzi lokhu okumunyethwe yizivumelwano lezi.
Ngakolunye uhlangothi bakhona abafana lo nkosazana Thabisile Mbele abathi eleChina selikuveze kwacaca ukuthi lifuna ukuhlenga izwekazi le Africa ebunzimeni ebhekane labo.
IChina ngelinye lamazwe alobudlelwano obukhulu kwezokuthengiselanana lamazwe eAfrica. Ezokuthengiselana phakathi kweChina le Africa ngo 2014 zedlule amabhiliyoni angamakhulu amabili ($220 billion).
Loba kunjalo inengi libheke ngamehlo abomvu ukuthi yini ezabe iphethwe ngamazwe eAfrica ekupheleni kwalo umhlangano ngoMgqibelo.