Umthethwandaba weHigh Court uthi abalimi abamhlophe abathathu abe Chipinge esigabeni seManicaland, abakade bekhangelelwe ukuthi basuke emapulazini abo ngokutshetsha, kumele bahlale kuze kulungiswe udaba lwabo lwamapulazi okumele athathwe nguhulumende.
UMnu. David Drury, igqwetha elimele abalimi laba, uthi isinqumo somthethwandaba lesi sizakwenza ukuthi abalimi laba bengakhitshwa ngesiphangiphangi emapulazini abo.
Abalimi laba babikwa sebebalekile emapulazini abo asethunjwe ngabantu abacatshangelwa ukuthi ngabalandeli bebandla le Zanu PF.
Kusenjalo, omunye wabalimi laba uMnu. Dawie Joubert kanye lo Mnu. Trevor Gifford, owayengumqondisi we Commercial Farmers Union, babotshiwe ngolweSithathu besetheswa icala lokweyisa umthwethwandaba kamantshi eChipinge.
UDawie lo Gifford abazame ukuhambisa kumantshi weChipinge amaphepha alesinqumo esenziwe ngumahluli wedale lomthethwandaba we High Court, uMnu. Samuel Kudya, bavalelwe esitokisini senkamba yamapholisa.
U Gifford utshele iStudio 7 ukuthi umantshi uMnu. Samuel Zuze oweChipinge uzonde wadla amahabula ephiwa amaphepha la ngabalimi abamhlophe laba.
Umthethwandaba Wethula Isinqumo Sokuthi Abalimi Abamhlophe Bengakhitshwa Emapulazini
- Gibbs Dube
