Umsebenzi lokhu umi mpo emgodini we Mimosa Platinum Mine eZvishavane kulandela ukuhlengwa kwezisebenzi ezingamatshumi ayisithupha lanhlanu kulumgodi ngolweSibili.
Izisebenzi lezi besezihlale ilanga elilodwa phakathi kwalumgodi ngemva kokuqhamuka komlilo ngoMvulo, ozivimbele ukuthi zizihlenge.
UMnu. Shadreck Pelewelo, umgcinisihlalo wenhlanganiso evikela amalungelo ezisebenzi zemigodi, I National Mine Workers’ Union utshele uSithandekile Mhlanga weStudio 7 ukuthi ngolweSithathu bekukhutshwa intuthu eyingozi kulumgodi.
Umphathintambo wezokwenjiwa kwemigodi uMnu. Obert Mpofu utshele uBlessing Zulu we Studio 7 ukuthi uhulumende usevikela abasebenza emigodini ngoba lokhu kungakaze kubelengozi enjengeye Hwange Mine Disaster ka1972 lapho abantu abedlula amakhulu amane-427 badilikelwa phansi komgodi.