Ziyaqhubeka inhlamba phakathi kwamalunga eZanu PF, uMnu Jonathan Moyo loMnu Chris Mutsvangwa phezu kokudonsela lengxabangxoza ekhona kuleli bandla.
UMutsvangwa, ongumphathintambo obona ngendaba zababengabalweli bempi yenkululeko uthi uMoyo, ongumphathintambo wezemfundo, ngumthengisi, ivaka lendoda elabaleka empini.
Ephendula enkundleni yebulenjini, iTwitter, uMoyo uthe uMutsvangwa lisela elalintshontsha izigqoko zabesifazana ezangasese lamapitikoti ngesikhathi sempi enkambeni ababehlala kizo esiyathengisa.
UMutsvangwa wethule amazwi kuphephandabeni leHerald ngoLwesithathu esithi uMnu Moyo nguye okhokhelwa icele leG40 lona elibangela ukungezwani kuZanu PF.
Ngalokho, uthe kumele axotshwe kumbe aphume ayebumba elakhe ibandla.
Kodwa uMoyo, okhanya sehlamukelwe ngamaphephandaba kahulumende, njalo osesilwa impi zakhe lamanye amalunga eZanu PF enkundleni yeTwitter, uthi uMutswangwa uyawwumana.
Kunsukwana ezedluleyo uMoyo udobhane lesikhulumeli sikaMongameli Mugabe uMnu George Charamba kwaba luthuli wamtshela aqatha, esithi uyisiyelele.
Ngokufanayo, uCharamba laye wamhlambaza uMoyo.
Ingcwethi kwezombusazwe uMnu Nkululeko Sibanda uthi zibehlise isithunzi inhlamba ezethulwa nguMoyo loMutsvangwa.
