Emizameni yokuqeda ukudonselana okukhona kuhulumende womayano, uMongameli Jacob Zuma weleSouth Africa sebize abamela iZanu PF leMDC ukuba bazehlangana lequla lakhe eCape Town kunkulumo eziqala ngoLwesithathu.
Udaba olumqoka olukhangelelwe ukuhlafunwa kulumhlangano, ngolomhlahlandlela wokhetho kanye lodaba olophathelane lesivumelwano sokubunjwa kukahulumende womanyano eZimbabwe eseGlobal Political Agreement.
Abamela iZanu PF leMDC kunkulumo lezi baqede ukuhlela umhlahlandlela wokhetho iroadmap, kumaviki asanda kwedlula. Kodwa ingcwethi ziyalusola lolugwalo lweroadmap zisithi alucaci ukuthi ukhetho kumele lwenziwe nini, kanti njalo akukho okumqoka abakhanya bevumelane kukho.
Umcebisi kaZuma, uNkosazana Lindiwe Zulu uthi bafuna kube lokuvumelana okuthile entweni ezitshiyeneyo phakathi kweZanu PF lamacele womabili aweMDC ngaphambilini komhlangano weSadc ozahlaziya udaba lweZimbabwe mhlaka 20 kuyonale inyanga.
Kunjalo nje, iqula leSadc lihlangane leziphathamandla zeMelika eWashington ngeviki edluleyo zicela uhulumende kaMongameli Barack Obama ukuba esule izijeziso azifakela uMongameli Mugabe labanye bakhe abakuZanu PF. Laphinda lahlangana njalo leziphathamandla zenhlanganiso yomanyano wamazwe awe Europe eyeEuropean Union eBrussels ngoLwesibili.
Omunye wabangene kulumhlangano utshele iStudio 7 ukuthi iziphathamandla zeEU zigcizelele ukuthi zifuna isivumelwano seGPA sigcwaliswe kuqala njalo kuhlelwe indlela ecacileyo yokhetho andubana izijeziso lezi zesulwe.
