UMongameli Jacob Zuma weleSouth Africa, yena ofike eHarare ngoLwesibili ukuyakhulumisana loMongameli Robert Mugabe, uMnu Morgan Tsvangirai loMnu Arthur Mutambara uqhube imihlangano labathathu laba ngoLwesithathu phezu kokuhluphayo kuhulumende womanyano.
UMnu Zuma uqale ngokuhlangana loMugabe, wazohlangana loTsvangirai loMutambara. Ubekhangelelwe ukuhlangana labathathu laba sebendawonye behlaziya okuhluphayo phakathi kwamabandla abo ntambama.
Bekhuluma ngemva kokuhlangana loZuma, uMugabe loTsvangirai bathe imihlangano yabo ihambe kuhle kakhulu. UZuma ubekhangelelwe ukuhlangana njalo loMnu Roy Bennett, oyisiphathamandla secele leMDC elikhokhelwa ngu Tsvangirai.
Okuhluphayo kuhulumende womanyano, kugoqela udaba lokungafungiswa kuka Bennett, osibalukhulu bezabelo abamacele womabili eMDC kanye lodaba lukaMnu Gideon Gono loJohannes Tomana. IMDC ithi ifuna uGono loTomana basuswe ezikhundleni, okuyinto ephikiswa yiZanu PF.
U Zuma ukhangelelwe ukugqiba uhambo lwakhe ngoLwesine njalo abazi ngokwenzakalayo bathi amathuba okuthi uzakwenelisa ukuyixazulula inkinga yeZimbabwe, afiphele.
Umsekeli wesikhulumeli secele leMDC elikhokhelwa nguMnu Mutambara, uMnu Renson Gasela uthi ibandla lakhe lifuna okuhluphayo kulungiswe ukuze uhulumende womanyano asebenze kuhle, okungamazwi agcizelelwe ngumsekeli wesikhulumeli seMDC ekhokhelwa nguMnu Tsvangirai, uNkosazana Thabitha Khumalo.
Kunjalo nje ibandla leMDC elikhokhelwa nguMnu Tsvangirai lethule isicelo edale lephalamende ngoLwesibili esokuthi kubunjwe ikomidi ezahlaziya udlakela oluqhamuke ngomnyaka ka 2008, olubulalise abasekeli balo abanengi. Lokhu kucunule kakhulu amalunga eZanu PF edale lephalamende acina ephuma kudale leli ngokukhalala.
NgoLwesithathu khona amalunga edale leli aqhubeke ehlaziya udaba lolu, kodwa abeZanu PF kabazange baphume lanxa nje beqhubeke bephikisa isicelo seMDC. Bezivikela, abeZanu PF bathe labo balobufakazi bokuthi abasekeli beMDC babulala abasekeli bakaMongameli Mugabe kudlakela luka2008.
