Umbukiso wezamabhizimusi lokuthengiselana oweZimbabwe International Trade Fair walonyaka ungene kulanga lesine edolobheni lakoBulawayo.
Ovule lumbukiso okusemthethweni uMongameli Yoweri Museveni wele Uganda ukhuthaze amazwe athuthukileyo ukuba bethule izijeziso zomnotho abazethesa eleZimbabwe.
"Ngiyabona ukuvula umbukiso weZimbabwe okwesibili kodwa ngisola kakhulu amazwe ethesa iZimbabwe izijeziso zomnotho ngoba ukwethesa ilizwe izijeziso zomnotho kutshengisa ubugwala njalo olunye udubo yikuthi asibambananga njengeAfrica, sibambene lathi besizakwala ukuba iZimbabwe yetheswe izijeziso zomnotho. Kuqakathekile njalo ukuba lingabothengisa impahla zenu lingakazihluzi lathola okuthe xaxa kuzo ngoba yikho okunye okusilethela ubuyanga ukuthengisela amazwe aphetsheya utshinda lamatshe ethu aligugu singakakuhluzi."
UMnu Nkululeko Ndebele uvumelane loMuseveni kodwa esola ubukhokheli obukhona ethi buyehluleka.
“Ngivumelana lenkulumo kaMuseveni yokwethula izijeziso zomnotho kodwamina ngisola inkokheli ezikhona ziyehluleka ukubusa loba izijeziso zingethulwa inkokheli zethu ziyazehlulekela ukubusa kahle..”
UMayor wedolobho lakoBulawayo, uKhansila Solomon Mguni uthi ujabuliswe yiMelika ngokuphenduka ukuzobukisa eZITF ngemva kokuma okweminyaka ethize, ethi bakhangelele ukuvuka kwamankampani lokubunjwa kobudlelwano obutsha lamanye amazwe.
“Siyamukela bonke abathe beza ukuzobukisa lokwenza amabhizimusi edolobheni lakoBulawayo. Njengedolobho siyajabula kakhulu ngokuphenduka kwezwe leMelika ukuzobukisa njalo eZITF ngemva kokuma iminyaka ethile lokhu kukhombisa ukuba kuzadala ubudlelwano obuhle obulakho ukuvuselela amabhizimusi ethu."
USenator Molly Ndlovu webandla leZanu PF,ukhanya laye eyijabulele inkulumo kaMuseveni.
“Umbukiso walonyaka ngiwubona uphakeme sikhangelele ukuthi ilizwe lithole amabhizimusi kanye lokuthola abathengi abasuka kwamanye amazwe kuthi abaze kuleli bayethengisa okweZimbabwe emazweni abo sibona lokuza kukaMuseveni."
UMuseveni kunkulumo yakhe yokuvula umbukiso weZITF ukhuthaze amazwe eAfrica ukuba abambane njalo azi ukuba anothile engabothengisa impahla yabo ingahluzwanga.
Umbukiso walonyaka uqoqwe ngendikimba ekhuthaza ukuvuselelwa kwamaindustry ngokuthengiselana phansi kwesihloko esithi ''Propagating Industrial Growth Through Trade and Investment”. Lumbukiso weZITF 2019 uphela ngoMgqibelo ngemva kokuvulelwa uzulu.
UMuseveni lomunye wakhe uMongameli Emmerson Mnangagwa babhode bebuka imisebenzi ehlukeneyo ebukiswa eZITF 2019, bayafika lasembukisweni wabeMelika bona abakade sebeleminyaka emithathu bengabukisi e Zimbabwe.
Amankampani edlula amakhulu amahlanu - 532 aweZimbabwe ayabukisa lonyaka. Amazwe alitshumi lambili, inengi lawo kungawemhlubulweni owangezansi ye Africa lawo akhona eze kumbukiso walonyaka.
