Usuzokwenziwa mhla ka 4 Lwezi umhlangano wokuhlaziya udaba lweZimbabwe.
Umhlangano wamazwe angezansi yeAfrica oweSADC oweExtraordinary Summit obekumele uqhutshwe ngoLwesibili usudluliselwe phambili ngemva kokubhekana lodubo lokuphazanyiswa kwamagagase njengoba ubuqhutshwa ebulenjini. Lumhlangano uzaqhutshwa ngoMgqibelo.
Lokhu kubikwe yisikhulumeli sehofisi kamongameli welizwe, uMnumzana George Charamba ongathandanga ukuveza ukuthi udaba lweZimbabwe lukhulunywe ngalo kumbe hatshi ekuqaleni komhlangano wanamuhla njalo kazange acace ngokuhlafunwe yinkokheli yeSADC.
UCharamba utshele umsakazo weStudio 7 lokhu. “Ngubani owathi iZimbabwe ikulolu hlelo? Yini umehluko phakathi kwe-Extra Ordinary Summit kanye le-Ordinary Summit? Yini i-Extra Ordinary Summit ? Angikukolodi nje ngencazelo.”
Bekukhangelelwe ukuba umhlangano lo, obumele uqhutshwe ngeviki ephelileyo, uhlolisise udaba lokhetho oluqhutshwe kwele Zimbabwe ngoNcwabakazi lolusanda kuqhutshwa Eswatini lokunye okuphathelane lezomvikela kwele Democratic Republic of Congo, Mozambique lamanye amazwe abhekane labahlamuki.
Abamabandla aphikisayo kwele Zimbabwe bafisa ukuba iSADC, esizaqhuba omunye umhlangano we-virtual Extraordinary Summit, ithathe isinqumo sokuthi kumele luphindwe ukhetho kwele Zimbabwe abathi kaluqhutshwanga ngemfanelo.
Iqula labahamba e Zimbabwe ukuyahlola ukhetho eleSADC Observer Mission lakubeka sobala ukuba abakhonona ngokhetho kumele belandele imithetho yelizwe.
Kodwa uMnu. Promise Mkhwananzi, isikhulumeli sebandla leCitizens Coalition for Change, uthi bafuna ukuba inkokheli yeSADC iphume lesinqumo sokuthi ukhetho lwenziwe kutsha eZimbabwe.
“Sidanile kakhulu ngamazwi la ngumkhulu weSADC esithi amhlophe kubandla leZanu Pf esithi ukhetho lwahamba kuhle. Lokho akusikho qiniso kodwa ke singadani kakhulu ngoba i-program yeSADC ayikapheli, mhla ka 4 November bezaqhubeka kumele simelele sibone ukuthi impumela yakhona kahle kahle izaba njani. Kungaba kuyikutshaya efihle umphini okwenziwe ngutshalimani asikwazi. Okuqakathekileyo yikuthi simelele i-program iphele sizwe iFull Statement yeSADC ezaphuma mhla ka 4 November.”
Ekuvulweni komhlangano wanamhlanje, umgcinisihlalo weSADC onguMongameli João Manuel Gonçalves Lourenço we Angola, utshayele ihlombe eleZimbabwe lele Eswatini ngokuqhuba ukhetho olukhulekileyo.
"Ngivumeleni ngiveze ithemba lethu lokuthi wona lo umoya ungabonakala okhethweni oluzoba khona eRepublic of Madagascar kanye laseDemocratic Republic of Congo."
Umqondisi obona ngokwethulwa kwemibiko kubandla leZanu PF, uMnumzana Farai Marapira, uthi akumangalisi okwethulwe ngumkhokheli wakwele Angola.
"Siyawamukela lo mlayezo wokusitshayela ihlombe njalo uyasigeza njengeZanu Pf ngoba kunengi ukuhlambalaza obekusenzakala, indaba ezingamanga kanye lokumangalelwa okunengi obekungokwamanga lokusolwa okukhulu ubekuqondiswe ekuthini ukhetho kaluqhutshwanga ngendlela. Amanga angasabalala kodwa iqiniso liyohlala liyiqiniso."
Kodwa uMnu. Effie Dlela Ncube owenhlanganiso ebona ngezamalungelo abathengi eyeNational Consumer Rights Association uthi kusobala ukuba iSADC ingeke yasiza uzulu weZimbabwe ukuxazulula inkinga yempumela yokhetho oluqhutshwe lonyaka.
"Akulanto emangalisayo ngomhlangano weSADC, ikuvezile kahle kamhlophe njalo ukuthi abantu beZimbabwe abangafaki ithemba phezu kwayo, kabasukume bazenzele ngokuba iSADC kayisoze ibe lusizo ekuletheni inguquko eZimbabwe, ekuletheni intando yenengi, ekuletheni ukhetho olukhululekileyo, ekuletheni ukuhlonitshwa kwemithetho lamalungelo abantu, kayisoze incedise kulokho iSADC. Ngokunjalo ke lokhu kuyinselelo kuyi-challenge ebantwini beZimbabwe ukuthi abasukume bona bazenzele lokho abafuna ukuthi bazenzele khona bangakhangeli umsindisi ovela kuSADC ngoba kasoze abe khona, iSADC kayisoze incede ngalutho."
Inhlanganiso eyeSADC yake yangenela kwezokhetho ngesikhathi kubusa umuyi umnumzana Robert Mugabe ngomnyaka ka2009. Kwacina kubunjwa uhulumende womanyano kulandela ukuqhutshwa kokhetho olwasolwa kakhulu ngamazwe womhlaba ngoba kwakusobala ukuthi ibandla eliphikisayo lalinqobile. Akwaziwa ukuba bengangenela njalo kukhetho oluqhutshwe lonyaka ngoba iSADC Observer Mission isigqibe umsebenzi wayo umbiko wabakubonayo ngokhetho lolu kwanikezwa uMongameli Emmerson Mnangagwa.
Lanxa inhlanganiso lamazwe angentshonalanga akubeka sobala ukuthi ukhetho lwalonyaka oluqhutshwanga ngemfanelo ikhomishini ebona ngezokhetho eye Zimbabwe Electoral Commission yethula umbiko wokuthi uMnangagwa nguye onqobe kulolukhetho lokudinga umongameli welizwe. Ngakwelinye icele umkhokheli weCCC uMnu. Nelson Chamisa etshaya ngenduku phansi ethi waqilwa libandla leZanu PF leZEC.
Forum