UMongameli Robert Mugabe uvule idale lephalamende ngoLwesibili wethula inhlelo idale leli elizalilandela lize liyevalwa ekupheleni komnyaka.Embikweni wakhe uMugabe uthe eleZimbabwe lizawathengisa amadayimana alo kungelani lokuthi lincitshwe imvumo yokwenza lokhu yiKimberly Process.Wengeze wathi inzuzo ezatholakala kulokhu ilakho ukuvuselela umnotho welizwe wona ongamanga kakuhle.
Imbiko le iza ngesikhathi inhlanganiso yabathenga amatshe edayimana emhlabeni jikelele eyeInternational Diamond Manufactures Assiociation isithi iZimbabwe kumele ivunyelwe ukuthengisa amadayimana enjiwa eMarange.
I Kimberly Process yona ihlangene ngoLwesibili kweleRussia ihlafuna udaba lwamadayimana eZimbabwe. Asenelisanga ukuzwa ukuthi kuyini okuphume kulumhlangano.
UNtungamili Nkomo weStudio 7 uxhume isikhulumeli seZanu PF uMnu Rugare Gumbo yena othi ibandla lakhe lijabuliswe kakhulu ngamazwi kaMongameli Mugabe.
Kodwa ilunga ledale lephalamende ekubandla leMDC elikhokhelwa nguMnu Arthur Mutambara uMnu Thandeko Zinti Mnkandla uthi kungaba kuyikuphambanisa okukhulu ukuthi amadayimana eMarange ethengiswe ngaphandle kwemvumo yeKimberly Process.
Insolo kaMnu Mnkandla igcizelelwe nguNkosazana Thabitha Khumalo olilunga ledale lephalamende ekucele leMDC elikhokhelwa nguMnu Morgan Tsvangirai.
