Ibandla leZanu PF lithi uMnu. Tendai Biti wala lemali yokuqedisa uhlelo lokuloba kutsha isisekelo sombuso esitsha. UMongameli Mugabe utshele umbuthano wokunanza ilanga lokuzalwa kwakhe eHarare ukuthi uMnu. Biti uhlezi phezu kwemali engange $2 million eyavela ekuthengisweni kwamadayimana.
Isikhulumeli seZanu PF, uMnu. Rugare Gumbo utshele intathelizindaba ngeSonto ukuthi sebecele uMugabe ukuthi abambe uBiti ngamadla ukuthi akhulule limali ngoba nxa engenzanga njalo kuzahle kwenziwe ukhetho masinyane. Omunye wabagcinisihlalo be COPAC, uNkosikazi Gladys Dube – Gombami utshele iStudio 7 ukuthi iZanu PF ikhanya ifuna kwenziwe ukhetho phansi kwesisekelo sombuso esikhona kathesi.
