Umongameli Mugabe usephe umanyano we African Union isipho senkomo ezingamakhulu amathathu osekucunule abanye abathi ufana lomuntu ogijima ukuyacitsha umlilo komakhelwane woma umuzi wakhe uphakathi kwamalangabi omlilo.
UMugabe, obengumgcinisihlalo womanyano lo, usuke kulesi sikhundla ngenyanga edluleyo ngemva komnyaka owodwa engumgcinisihlalo. Wenza isithembiso sokupha lumanyano ngenyang edluleyo esithi kumele aphathise ngendlela ayenelisayo engasomali.
Inkomo lezi zibikwa zivele ebantwini makhaza abaphe umongameli ukuthi aphe inhlanganiso ye African Union.
Umsekeli kamgcinisihlalo we African Union Commission, uMnu. Erastus Mwancha ubese Harare ngoLwesihlanu esithi usezothatha inkomo lezi.
Kodwa abanengi kabasuthiseki ngesipho lesi besithi ngabe uMugabe ebuthanisa izipho esipha abaswelayo eZimbabwe.
"Ehamba ukuyadonetha inkomo ezingu 300 khona kulabantu abalambayo. Kulabantu abadinga umsebenzi, kulabantu abangayi esikolo. Sure kuyamangalisa ukuthi kuseyikubusa yini," kutsho uBhebhe.
UBhebhe uthi kuyamangalisa ukuthi inkomo lezi engaba ezithethe ngaphi njalo kutshengisa ukuthi zinkomo azithathela abelungu.
