Umongameli Robert Mugabe wazise amagama abomahluli bemithethwandaba abakhethe engakhulumisananga lamanye amabandla akuhulumende womanyano.
U Mugabe ugcobe uMnu. George Chiweshe owayeku Zimbabwe Electoral Commission ukuba ngumqondisi wabomahluli, uNkosikazi Rita Makarau ukuba ngumahluli wedale le Supreme Court, uMnu. Nicholas Mathonsi, uMnu. Garainesu Mawadze kanye lo Mnu. Andrew Mutema ukuba ngomahluli be High Court.
Abanye bathi uMongameli Mugabe akalalungelo lokukhetha omantshi kumbe omahluli engakhulumisananga lamanye amabandla abusayo kodwa abebandla le Zanu PF bathi ulamandla awaphiwa yisisekelo sombuso welizwe ukuthi agcobe omantshi labomahluli engakhulumisananga labusa labo.
Umnu. Nelson Chamisa isikhulumeli sebandla le Movement for Democratic Change ekhokhelwa nguMnu. Morgan Tsvangirai uthi batshe amathe besizwa lokhu.
U Chamisa uthi lokhu kwenzakala ngesikhathi amabandla akuhulumende omanyano esehluleka ukuvumelana ukuthi kuxotshwe uMnu. Gideon Gono usibalukhulu we bhanga elikhulu lelizwe legqwetha elikhulu lelizwe uMnu. Johannes Tomana ababekwa nguye nguMongameli Mugabe eyedwa.