Umongameli Emmerson Mnangagwa ngoMgqibelo ukhuthaze eleMelika ukuthi lethule izijeziso elazethesa eleZimbabwe ngoba zingezinye zembangela yokuwa komnotho welizwe.
Esethula umbiko wakhe wokunanza iminyaka engamatshumi amane ilizwe selokhu lathola uzibuse umongameli Mnangagwa utshayele ihlombe abalwa kumpi yenkululeko, njalo wakhuthaza abantu ukuthi beqhubeke behlezi ezindlini, ku lockdown, ukwenzela ukwenqabela ukumemetheka kwegcikwane leCoronavirus.
Uphinde wabonga amazwe aphetsheya kanye lenhlanganiso ezehlukeneyo ezincedisa ilizwe kulwisana laleligcikwane.
Umongameli Mnangagwa ugcizelele ukuthi uhulumende usebenza gadalala ukubona ukuthi abantu bathole ukudla okweneleyo njalo ahlawulele abantwana abangenelisi ukubhadala indleko zesikolo.
Ngenxa yeCoronavirus, umkhosi lo awusaqhutshwanga koBulawayo njengalokho okwakuhlelwe nguhulumende, ngakho inengi lilalele amazwi kamongameli Mnangagwa kumabonakude lakuma radio ngoba kungelambuthano. Uhulumende uthi abantu bazakwaziswa ngeSonto ukuthi uhlelo lokuhlala ezindlini olwe lockdown, osolufika emaphethelweni, luyaqhubeka kumbe hayi.
Asizweni ingxenye yamazwi akhe.
Abanye abethule imbiko yabo ukunanza ilanga likazibuse bagoqela ingatsha ezehlukeneyo zebandla leZANU PF,uMnu. Nelson Chamisa, okhokhela ibandla leMDC, loNkosazana Thokozani Khuphe weMDC-T, bona abakhulume ngokuqakatheka kokuthuthukisa umnotho welizwe ukwenzela ukuthi abantu baphile impilo engcono.
Kusenjalo, uAnnastacia Ndlovu uxoxe labalwa kumpi yenkululeko ukuze sizwe imbono yabo ngelanga lanamuhla, elokunanza uzibuse.