Ihofisi yommeli weZimbabwe kweleBotswana ithi ayikakhulumisani leziphathamandla zakulelozwe phezu kodaba lokuntshontshwa kwenkomo emizini esemngceleni yamazwe womabili. Umongameli Mokgweetsi Masisi walelo lizwe, ngeviki edluleyo, uveze ukukhathathezeka ngabathi bavela eZimbabwe, abazontshontsha inkomo behlomile osekubangela ukuthi ezinye izakhamizi zibaleke zitshiye imizi.
Ekhuluma ekwethekeleleni kwakhe emangweni weBobirwa oduzane lomngcele weZimbabwe ngeviki edluleyo, uMongameli Masisi, uthe ilizwe lakhe likhathazekile ngokuntshontshwa kwenkomo, esethesa abakomakhelwane umlandu wokudala lawo macala.
Uthi abeZimbabwe bachapha umngcele, abanye behlomile bezontshontsha inkomo bebuyele emuva. Lokhu kubikwa sekudale ukuthuthukuthela okukhulu, osekubone izakhamizi ezihlala kuzigaba ezisemngceleni, zibumba amaqembu okulwisana lamasela enkomo.
UMasisi uthi okudanisayo yikuthi ezinye izakhamizi sezibaleke zatshiya imizi ngenxa yokwesaba abantu abantshontsha inkomo, abayabe behlomile.
“Abantu bethu sebephenduke iziphepheli elizweni labo.Ungeke wakhokhela ilizwe lapho abantu abakhitshwa emzini yabo yizikliwi. Angingeke ngikuvume lokho, kumele isimo sibuyele endaweni yaso, njalo sizabuyela.”UMasisi uthi uzakhulumisana lomongameli Emmerson Mnangagwa phezu kodaba lolu. Kodwa ngaphambi kwalokho, ommela iZimbabwe kweleBotswana, umnunzana Henry Mukonoweshuro, kumele avakatshele imizi ekhala ngodubo lokuntshontshelwa inkomo, ukuze ayezibonela ngawakhe amehlo.
“Ludaba engizalukhulumisana lomongameli Mnangagwa. Kodwa ngaphambilini, ngizacela umphathintambo obona ngobudlelwano beBotswana lamanye amazwe, ukuthi athathe ommele iZimbabwe kweleBotswana, azozibonela okwenzakalayo.”
Ihofisi yommeli weZimbabwe kweleBotswana ithi kayikatholi umbiko ovela kuhulumende weBotswana phezu kodaba lolu.
Izakhamizi ezivela emangweni esemhlubulweni yeGwanda engezansi yeMandebeleni, ezifana lomnunzana Rodwell Moyo, uthi udaba lokuntshontshwa kwenkomo zeBotswana lwaqina ngemva kwenyathela leBotswana lokuqala ukudubula inkomo zeZimbabwe.
“Kulohlupho lwezifuyo. IBotswana isidubulela inkomo zethu. Akuqondanga ukuthi iBotswana idubule inkomo. EBotswana kuyantshotshwa inkomo, ngendlela eZimbabwe kuntshotshwa inkomo. Ludaba okumele lulungiswe phakathi kwamazwe womabili.”
Kusenjalo, eleBotswana lithi alithumelanga amakampani ngaphansi kwenhlanganiso yomanyano owe Botswana Investment Trade Centre (BITC), ukuyabukisa eZimbabwe International Trade Fair.
IBITC, ithi amakampani angaphansi kwenhlanganiso le, aphatheke komunye umbikiso kweleDubai.
Kolunye udaba, abahlanu abeZimbabwe abaphanyeka udaba emthethwandaba ukuthi bengabuyiselwa emuva lezinye iziphepheli, bazalindela mhlaka 30 Lwezi ukuze bezwe ngesimo sabo.
Abahlanu laba abayiziphepheli bathi angeke baphindele eZimbabwe ngoba besesaba ukuhlukunyezwa nguhulumende weZANU PF.