UMongameli Ian Khama weleBotswana uthi uhulumende weZimbabwe kumele eqhube ukhetho olukhululekileyo njalo olungela dlakela ukuze kwenqatshelwe ukuchitheka kwegazi elizweni.
UKhama wethule amazwi la esamukela uMongameli Michael Sata weleZambia eGaborone ngoMvulo. UMnu Sata uphakathi kokwethekelela lelolizwe.
UMongameli Khama uthe amazwe athi iZimbabwe leMadagascar kumele alandele umzekeliso weZambia kwenziwe ukhetho olukhululekileyo kathi lonqotshiweyo avume ukusuka esihlalweni.
UMongameli Sata unqobe obenguMongameli weZambia nyakenye uMnu Rupiah Banda, yena otshiye kuhle isikhundla kungela dlakela wavuma ukuthi unqotshiwe.
UKhama yena ngumuntu oyaziwayo ngokusola umbuso kaMongameli Mugabe, kodwa kunyanga ezedluleyo ubengasamsoli kangako.
Ngenyanga edluleyo uthumele inkokheli yakhe yebutho eHarare yayahlangana loMugabe, okuyinto inengi elithe iveza ukuthi imbono kaKhama ngoMugabe iya iguquka.
Ingcwethi ecubungula ezombusazwe uMnu Dumisani Nkomo utshele iStudio 7 ukuthi amqotho amazwi kaKhama, wathi inkokheli yezansi kweAfrica layo kumele ikhuthaze ukhetho olukhululekileyo eZimbabwe.
