Uphawulwe okusemthethweni ngoMvulo, umnyaka wokuqhuba umsebenzi kwababona ngezokuthoniswa kwamacala ka 2016, kulokukhathazeka phezu kwamacala azinkulungwane ezedlula amatshumi amane- 40,000, alokhe elindele ukuthoniswa edale le High Court, kusukela ngomnyaka ka 2012.
Abe Judiciary Services Commission lamagqwetha batshengise ukukhathazeka phezu kokuphuza kokwehlukaniswa kwedale le Constitutional Court lele Supreme Court, njengalokho okutshiwo yisisekelo sombuso, besithi kuzophathisa ekuthonisweni kwamacala hatshi lesi simo ilizwe elikuso.
Emkhosini owenzelwe egcekeni le Constitutional Court, e Harare ngoMvulo ekuseni, umgcinisihlalo we Judiciary Services Commission, u Chief Justice Godfery Chidyausiku uncome indlela amadale aqhube ngayo ngomnyaka odluleyo kodwa watshengisa ukukhathazeka phezu kokuphuza kokulandelwa kwalokho okumunyethwe yisisekelo sombuso, lokwehlukaniswa kwemisebenzi kumadale amabili, ele Constitutional Court le Supreme Court, kube ngomahluli abehlukeneyo abathonisa amacala.
Okungumqondo owamukelwe nganjabulo langamagqwetha aze kulomkhosi okubalisa umnumzana Mordecai Mahlangu.
Usola indlela amapholisa asebenzelana ngayo labamadale uMahlangu ethi ngokunye kokubangela ukuphuza kokuqhutshwa komsebenzi.
Umnumzana Nelson Chamisa isiphathamandla sebandla leMDC-T, ungomunye wamagqwetha abekulomkhosi laye,wapha umbono wakhe phezu kodaba lokwehlukaniswa kwamadale la njengalokho okukusisekelo sombuso.
Omantshi, amagqwetha bavumelana njalo phezu kokuba kumqoka ukuba kusungulwe amadale e High Court emadolobheni ezabelo okubalisa eMasvingo, eHwange, eGweru leMutare, okwamanje esebenza njengama circuit courts.
Abe Judiciary Services Commission laba bathi okubuyisela muva lumsebenzi yikuswelakala kwemali kodwa isifiso sokwenza lokho sikhona kuqalwa ngalezo zigaba lapho kulenani eliphezulu lamacala adalwayo.