Owake waba yisiphathamandla seZanu PF uMnu Edgar Tekere, yena obhubhe ngoLwesibili senikezwe inhlonipho yeqhawe lesizwe.
UTekere unikwe linhonipho ngoLwesine lidale leZanu PF Politburo. Udliwe ngumkhuhlane wemvukuzane njalo ubeseleminyaka engamatshumi ayisikhombisa lane-74.
Uzabekwa emalibeni eNational Heroes Acre ngeSonto. UTekere ngomunye wabantu abahlamukela uMnumzana Joshua Mqabuko Nkomo kubandla leZapu ngomnyaka ka1963 babumba ibandla leZanu.
Ungomunye wabantu ababotshwa bahlukuluzwa nguhulumende woncindezelo wabamhlophe ngoba bekhankasela uzibuse wabensundu.
Ngeminyaka yabo 1980 wake wetheswa icala lokubulala omunye umlimi omhlophe kodwa idale leHigh Court lamthola emsulwa lanxa ebikwa wayezitshaya isifuba ebanganeni bakhe esithi ngempela wakwenza lokhu.
Ngomnyaka ka1988 uTekere waxotshwa kubandla leZanu PF ngoba wayehlezi exabana labanye bakhe ikakhulu uMongameli Robert Mugabe, wasebumba ibandla lakhe lezombusazwe eleZimbabwe Unity Movement-ZUM.
Ngomnyaka ka1990 wancintisana loMugabe kukhetho lokudinga uMongameli welizwe kodwa wanqotshwa.
Uthe ngokunqotshwa kwakhe umuyi kasazange abe’saphatheka kangako kwezombusazwe.
Kodwa abamaziyo bathi ekufeni kwakhe inhliziyo yakhe ibikuZanu PF lanxa nje ebengavumelani lemikhuba yalelibandla eminengi.
Isikhulumeli secele leMDC elikhokhelwa nguMnu Welshman Ncube uMnu Nhlanhla Dube uthe ibandla lakhe liyajabula ngokunikezwa kukaTekere inhlonipho yeqhawe lesizwe ngoba walwa impi yenkululeko.
Ukuhlaziya loludaba uSithandekile Mhlanga weStudio 7 uxoxe lelunga leNational Constitutional Assembly uMnu Alois Dzvairo lelunga leMDC ekhokhelwa nguMnu Morgan Tsvangirai uMnu Abednico Bhebhe.
