Ibandla leZanu PF lithi udaba lukaMnu. Munyaradzi Kereke lokuba lilunga ledale lephalamende lwalungisiswa kudala okokuthi ukukhuluma ngalo kathesi yikumotsha isikhathi.
UKereke wancintisa kukhetho lukamnyaka ka 2013 ezimele ngemva kokuba ibandla leZanu PF lakhetha uMnu. Elias Musakwa ukuthi ancintise isigaba seBikita West hatshi yena. Kodwa uKereke waqhubeka wancintisa ezimele wanqoba.
Ngemva kokhetho ibandla leZanu PF lazama ukumxotsha edale kodwa yena wagijima waya emthethwandaba wokhetho esithi kangeke axotshwa liabandla le Zanu PF ngoba wancintisa ezimele.
Kodwa kunsuku ezisanda kwedlula uKereke wazise ukuthi sephindele kubandla leZanu PF. Phansi kwesisekelo sombuso welizwe esitsha ilunga ledale lephalamende lingeqa uthango liye kwelinye ibandla liyahle liphelelwe ngumphako.
Kodwa okhokhela amalunga edale lephalamende awebandla leZanu PF uMnu. Joram Gumbo utshele iStudio Seven ukuthi bavumelana loKereke phezu kwaloludaba ngakho ulelungelo lokumela ibandla leZanu PF edale lephalamende.
