Usikomitshi wamapholisa uMnu Augustine Chihuri sechaze uMongameli Robert Mugabe njengomuntu owalethwa ngunkulunkulu ukuzekhokhela ilizwe leZimbabwe.
Ekhuluma emkhosini wokuphothula kwamapholisa asanda kugqiba izifundo zawo eHarare ngeSonto, uChihuri uthe iZimbabwe ibusisiwe kakhulu ngokuba lomkhokheli ofana loMongameli Mugabe.
Amazwi kaChihuri aza lapho amacele womabili eMDC esithi afuna yena labanye bakhe abakhokhela ingatsha ezitshiyeneyo zomvikela basuswe ezikhundleni ngoba besekela ibandla leZanu PF.
Kodwa uMugabe uveze ngeviki edluleyo ukubana kasoze avume lokhu kusenzakala.
Isikhulumeli seMDC ekhokhelwa nguMnu Welshman Ncube uMnu Nhlanhla Dube uthi amazwi kaChihuri ngawomuntu ongamelanga abe ekusikhundla akuso.
Amazwi kaDube agcizelelwe yingcwethi ecubungula ezombusazwe uMnu Effie Dlela Ncube.
