UMongameli Emmerson Mnangagwa umangalise umhlaba wonke ngoLwesihlanu ekhuluma emhlanganweni eSt. Petersburg kwele Russia lapho athembise ukhokheli wakulelolizwe ukumupha impisi uma ilizwe lakhe lizifuna.
Lokhu kukitaze uMnu. Vladmir Putin othe ilizwe lakhe lilempisi ezinengi ngakho-ke angeke asemukela isipho leso.
Inkulumo yakhe le iqale ngesikhathi kuhlaziywa ngokusetshenziswa kwezikhali zohlobo lwe-nuclear kulandela okwenziwe ngele Melika, eleFrance lamanye anike eleUkraine izikhali zokuhlasela eleRussia elithwalise nzima eleUkraine.
UMnangagwa uthe amazwe entshonalanga afana lempisi ezingabulala umuntu zingamhlasela kodwa zilakho ukubaleka uma engazixotsha esebenzisa umqayi.
Kulapho-ke akhulume kabanzi ngempisi kwele Zimbabwe esithi ziyanda okumangalisayo elizweni. Uthe esethula amazwi la uPutin wahlekahleka engakamphenduli.
UMnangagwa uqhubekele phambili ngodaba lwempisi wathi zinengi okokuthi enganika ezinye uPutin.
Umkhokheli wakwele Russia umphendule esithi kazifuni ngoba zigcwele phamu impisi elizweni lakhe lakuzwekazi le-Europe.
Kusenjalo, abantu abanengi eZimbabwe bachothoza okwethulwe nguMmnangagwa emhlanganweni awenze loPutin lapho amtshele ukuba kahlalisekanga ngobudlelwano belizwe leZambia, eleMalawi lele Melika.
Uthe eleMelika linika amazwe la imali yezomvikela ukwenzela ukukhawulisa eleZimbabwe.
Bathi bekungamelanga uMnangagwa ethule lokhu ngoba kuzakwenza amazwe la angadlelani kahle lele Zimbabwe.
Forum