UMongameli Emmerson Mnangagwa uthi uhulumende wakhe uhlela ukwethula ezinye indlela zokusetshenziswa kwemali kulandela ukuqhubeka kokwehla kwesisindo semali yeZimbabwe eyamaRTGS. Ubekhuluma ngesikhathi uvula umhlangano walonyaka owedale labaphathintambo bakahulumende ele Cabinet emzini wakhe owe State Kouse.
Lokhu kwenzakala ngesikhathi idola leZimbabwe liqhubeka lisehla isisindo okwethusayo kusukela ngomnyaka odluleyo, inengi labantu selikhetha ukusebenzisa idola le Melika.
UMnangagwa uthi kuqhakathekile ukuthi uhulumende alungisise udaba lwemali eZimbabwe esithi ensukwini ezilandelayo uzakwazisa indlela ezihlelwa nguhulumende ekulungisiseni udaba lolu.
“Sizakuza lendlela zokwenza ukuba silungise udaba lwemali kuleli, ukuze abantu babe lemali egcinekayo ezindlini. Sizalitshela ukuba sizakwenza njani ukuba silungise udaba lwe mali kuleli.”
UMongameli Mnangagwa uqhubeke esithi uhulumende wakhe uzalungisisa udubo lokukhuphuka kwentengo yempahla kuleli.
Uthe uhulumende wakhe lonyaka uzakhangela kakhulu umgwaqo we Harare- Chirundu, umgcele le Forber Border post, Harare Kanyemba, idamu le Gwayi Shangangi lokuthuthukisa inkampani kaloliwe eye National Railyways of Zimbabwe.
Ingcitshi ezicubungula ezomnotho zithi idola leZimbabwe, lehle isisindo ngesilinganiso esiphose sibe ngokuphethwe kabili ekhulwini- 90%, kuthi abantu abangaba yisilinganiso sokungamatshumi ayisitshiyangalombili-80% selisebenzisa idola le Melika.
Ingcitshi ziqhubeke zisithi inengi le Zimbabwe alisela themba ukuba uhulumende ulakho ukulungisa udubo lokukuwa kwesisindo semali ye Zimbabwe nxa liqathaniswa leleMelika.
Enye yalezi ngcitshi zomnotho esebenza lenhlanganiso ye Centre for Disability ngu Mnu Masimba Kuchera othi ukuze uhulumende alungise udaba lolu kumele akhulumisane lozulu labosomabhizimusi ngoba inengi alimethembi.
“Nxa kuyikuthi bafuna ukuguqula indlela yokusetshenziswa kwemali kumele kube lenkulumo phakathi kukahulumede, osomabhizimusi, abantu kazana lezisebenzi. Uhulumende angasebenza yedwa izinto zizaqhubeka zinzima.”
Lokhu kusekelwe ngenye ingcitshi esebenza lenhlanganiso ye COMALISO uMnu Rejoice Ngwenya othi kusobala ukuba uhulumende kumele alungise udaba lwemali ngoba soludala ubuyanga elizweni.
“Uhulumende ufuna ukuguqula imthetho yemali ngoba ibond note lithwaliswe nzima lidola le Melika. Akusoze kwenze ukuba balungise idola ngoba abantu abakuhulumende nguye owaletha udubo lolu’’
Kunje idola leMelika selithengwa ngamadola aweZimbabwe azinkulungwane eziphezu kwezilitshumi-RTGS13,500 emkhambo wamabhanga. Kuthi emkhambo wensitha sekudingakala amadola awe Zimbabwe azinkulungwane ezimbili- RTGS20,000 ukuthenga idola elilodwa leMelika.
Ingcitshi ezibalisa ingcitshi elodumo kwele Melika uMnu Steve Hanke zithi imali yakwele Zimbabwe yiyo engasela sisindo ukwedlula imali zonke emazweni womhlaba.
Kulonye udaba, ummeli we Bhilithani e Zimbabwe, uMnu Peter Vowles namhlanje wethekelele usomlomo wedale lephalamende ele National Assembly, e hofisini yakhe ese Mount Hampden.
UMnu Vowles wazise ukuba ele Bhilithani lizimisele ukukhulumisa lele Zimbabwe ikakhulu endabeni zombuso wentando kazulu.
“Sikhulume ngokuqakatheka kwephalamende yakwele Zimbabwe. Sikhulume ngemthetho abafuna ukyibeka ephalamende ye Zimbabwe njalo sixoxe ngokunengi phakathi kokudlelana kwethu lele Zimbabwe’’
Lokhu kwenzakala ngesikhathi ziqiniswa izijeziso zomnotho, eziqondiswe kwezinye iziphathamandla zikahulumende weZimbabwe lengatsha zikahulumende okugoqela inkampani yezomvikela eyeZimbbawe Defence Industries (ZDI) eziqiniswa minyaka yonke ngamazwe athuthukileyo anjengawe European Union.
UVowles walile ukukhuluma lentathelizindaba ukuba ele Bhilithani lithini ngalokho okwabekwa ngabe EU okokuqinisa izijeziso zomnotho eziqondiswe kwele Zimbabwe.
Usomlomo wephalamende uMnu Jacob Mudenda uthe buyamthabisa ubudlelwano phakathi kwelizwe lakhe lowe Bhilithani obulokhe busiba ngcono.
“Sithokoze kakhulu ukuba lommeli we Bhilithani kuleli sixoxisana ngobudlelwano bethu njengamazwe womabili’’
Ubudlelwano be Bhilithani le Zimbabwe baphazamiseka kakhulu ngesikhathi uhulumende we Zimbabwe aze athathele abamhlophe amaphulazi kuhle lokwaba kutsha umhlabathi ngomnyaka ka 2000, okulapho ele Bhilithani lethesa ele Zimbabwe izijeziso zomnotho ngenxa yokungahlonitshwa kwamalungelo oluntu lapho eqhuba lolo hlelo lapho okwahlukunyezwa, ukutshaywa lokubulawa kwabanye abamhlophe.
Ngokungena kuka Mongameli Mnangagwa ngomnyaka ka2017 wathembisa ukuvuselela ubudlwelwano phakathi kwamazwe la womabaili kodwa lanamhlanje akula okucacayo kundlela amazwe la adlelana ngayo.
Forum