UMongameli Emmerson Mnangagwa uthi uzakwehla embusweni ngomnyaka ka2028 lapho azaphutsha khona amahlandla akhe okubusa amabili avunyelwa yisisekelo sombuso welizwe – iZimbabwe Constitution.
Ekhuluma eseMutare Teachers College, uMnangagwa uthe ibandla leZanu-PF lizakhetha umkhokheli omutsha ozamelama kuCongress njengenhlalayenza.
Amazwi akhe aza ngesikhathi abanye kuZanu PF besithi uMnangagwa kumele eguqule isisekelo sombuso welizwe ukuze simvumele ancintise njalo kukhetho luka2028, okuyinto ebikwa ibisidala ukufuthelana kubandla elibusayo.
Kodwa namuhla ukubeke sobala ukuba usefisa ukuphumula, kukhethwe umuntu omutsha. Wangena esikhundleni lesi kulandela ukugunqulwa kuka hulumende kamuyi uRobert Mugabe owasuswa libutho. Akesizwe uMnangagwa ekhuluma ngodaba lolu eseManicaland.
Ababona ngokwenzakalayo bathi akulaqiniso ukuba uMnangwagwa uzasuka esikhundleni ngoba kulabanye abathi uzavotelwa kukhetho oluzakwenziwa ngo2028 ngakho-ke uzabe ekhona ngo2030.
Omunye wabathandabuza okwethulwe nguMnangagwa nguMnu. Discent Collins Bajila, okubandla leCitizens Coalition for Change. Uthi uMnangagwa ulakho ukusoma ngodaba lolu esenzela ukuba amalunga eZanu PF ambisele esikhundleni.
Kodwa abakubandla leZanu PF bayakusekela okwethulwe nguMnangagwa. UMnu. Joseph Tshuma omele iPelandaba/Tshabalala edale lephalamende uthi uMnangagwa ukhulume kwazwela.
Forum