UMongameli Emmerson Mnangagwa namuhla uhlangene labenhlanganiso ezehlukeneyo labameli bamazwe atshiyeneyo wokudinga amacebo okuthi ele Zimbabwe lingancediswa njani ukuthi libhadale izikwelede zakwamanye amazwe. Lezi zikhwelede sezidala ukuba ilizwe lehluleke ukuboleka imali kumabhanga agoqela eleWorld Bank, International Monetary Bank lamanye.
Ekhuluma emhlanganweni lo, uMongameli Mnangagwa wazise ukuba eleZimbabwe lizimisele ukwenza konke okusemandleni alo ukuba lenelise ukubhadala izikwele lezi esezifika amabhiliyoni alitshumi phose lantathu - US$12.3 billion. Wazise njalo ukuba ilizwe liphakathi kwemihlangano ehlukeneyo lenhlanganiso eye International Monetary Fund eyokuba lingabhadala njani imali le.
“Sizama ngazo zonke indlela ukuba sikhulumisane le IMF ukuze basitshengise ukuba senze njani ngoba izikwelede lezi zisithwalise nzima,’’ kutsho uMnangagwa.
Owayengumongameli wakwele Mozambique uMnu. Joachim Chissano yena okhokhela iqula laphezulu lokubona ukuba iZimbabwe iyabhadala izikwelede uthe kumele ilizwe likhuthalele ukuhlawula abamhlophe abathathelwa amapulazi ngohlelo lokwaba kutsha umhlaba njalo lihloniphe amalungelo oluntu.
‘’Ele Zimbabwe kumele lilungise indaba zomnotho, umbuso wentando kazulu lokubhadala imali zabamhlophe abathathelwa umhlabathi okungancedisa ukuba izikwelede lezi zikhitshwe,’’ kutsho uChissano.
Lokhu kusekelwe ngummeli weMelika eZimbabwe, uAmbassador Pamela Tremont yena othi kumele ilizwe lihloniphe amalungelo oluntu ukuze lihlonitshwe emhlabeni wonke.
“Sikhuthaza ukulwisana lenkohlakalo, ukuba kuhlonitshwe amalungelo oluntu lokuthi abantu babe lenkululeko yokukhuluma okusenhliziyweni zabo,’’ kugcizelele uTremont.
Ingcitshi kwezomnotho esebenza lenhlanganiso yeLabour and Economic Forum uMnu. Hebert Mpala uthi akaboni kusiba lenguquko kuloluhlupho ngaphandle kokuba ilizwe lizimisele ukulungisisa amaphutha alo.
‘’Ele Zimbabwe kumele lizame ukuba liyabhadala limali lilandele iziqondiso eleziphiwa zingcitshi. Lokhu yikho kuphela okulakho ukuvuselela umnotho wakuleli.”
Umphathintambo wezemali uMnu Mthuli Ncube wazise ukuba ilizwe lilaso isifiso sokuhlawula abalimi abamhlophe abathathelwa amapulazi ukuze ilizwe libuyele kusimo sokuba ngelinye lamazwe ahlonipha ilungelo loluntu.
Omunye okade esemhlanganweni lowu ngu Mongameli webhanga le African Development Bank, uMnu Akinwumi Adesina, uthe ibhanga leli lizancedisa eleZimbabwe ukuba lenelise ukubhadala imali.
Ingcwethi ezicubungula ezomnotho zithi eleZimbabwe libhekane lobunzima obugoqela ukwehla kwesisindo semali yelizwe okulakho ukwenza ukuba lehluleke ukubhadalela izikwelede zalo.
Inhlanganiso yomanyano wamazwe omhlaba eyeUnited Nations ibika ukuba amazwe afika amatshumi amabili lane - 24 emazweni angamatshumi amathathu lanhlanu - 35 adubekayo kakhulu asengozini yokwehluleka ukubhadala izikwelede lezi.
Forum