UMongameli Emmerson Mnangagwa uthi ibandla leZanu PF lizajezisa amahlongandlebe akubandla leli atshotshozela ukungezwani.
Wethule lokhu ngesikhathi kulokuxokozela kubandla leli phezu kodaba lokusuka kumbe ukuhlala kwakhe embusweni kungafika umnyaka ka2028.
UMnangagwa, owethule amazwi la emhlanganweni wedale leCentral Committee eHarare namuhla, uthe kulamalunga ebandla leli abaphikisana lalokho okuthandwa nguzulu. Kazange aveze amagama alabo abenza lokhu lobanje kusobala ukuba kubangwa ukuthi asuke kumbe ahlale esikhundleni kungafika umnyaka ka2028.
“Kumele silwisane lamahlongandlebe kubandla leZANU PF. Kulabantu abaphazamisa imthetho yethu. Sizazama ukuba sibakhuze ngendlela ezilukhuni sisebenzisa imthetho yethu eyebandla,”kutsho uMnangagwa.
Lokhu kuza ngesikhathi kulemibiko ethi umsekeli wakhe uMnu. Constantino Chiwenga ufuna ukuthatha isikhundla sikaMnangagwa singafika isikhathi sakhe sokusuka esikhundleni. Kodwa uChiwenga kakakhulumi lutho ngodaba lolu. Ubekhanya ezondile uMnangagwa ekhuluma emhlanganweni lo.
UMnangagwa uthe,“Phansi labathengisi. Silabathengisi na lapha?’’
Ibandla leli liqhube umhlangano wedale leCentral Committee lo kulandela owenziwe izolo owedale lePolitburo ngesikhathi kulungiselelwa umhlangano omkhulu oweAnnual National People’s Conference ozaqhutshwa koBulawayo. Ingcitshi kwezombusazwe zithi kusobola ukuba kulokulwisana kubandla leli ngenxa yokungazakali kokuba uMnangagwa uzatshiya isikhundla sakhe kumbe hatshi ngo2028.
Eyinye yezingcwethi lezi, uMnu. Bekezela Gumbo, uthi kulokutshaya amanz’amnyama kubandla elibusayo.
“Kusobala ukuba amazwi lawa aqondiswe kuChiwenga yena ofuna ukuthatha isikhundla sika Mongameli. Lokhu yindlela yokutsho nje ukuba selidumela emansumpeni kuzaliwa.’’
: UMnu. Henry Dube owenhlanganiso yePeople Power laye uthi kuthunq’uthuli kubandla leZanu PF ngodaba lombuso kamongameli.
UDube uthi, “Kumele uzulu we Zimbabwe ananzelele ukuba balwisana bodwa. Akulani lozulu weZimbabwe lokhu. Kufana xathu lesakubona ngo 2017 kukhitshwa uMugabe.’’
Kulabanye abathi udaba lolu lulakho ukukhulunywa emhlanganweni ozaqhutshwa koBulawayo. Kodwa uMnu Teddy Ncube, okunhlanganiso yeLeaders for Africa Network, uthi umhlangano webandla leli kawusoze ukubeke kube sobala ukuba ngubani ozathatha intambo zombuso ngo2028.
“Akukacaci kahle lokhu. Umhlangano lowu kawusoze usize ukuba kukhanye ukuthi ngubani ozathatha umbuso ngoba uMnangagwa engakaqondisisi ukuba ufunani,’’ kutsho uNcube.
UMnangagwa usekhulume kathathu ngokuthi kafisi ukuqhubekela phambili esembusweni kodwa kulamalunga ebandla leZanu PF athi kumele ahlale esikhundleni.
Amalunga la atshaya isilogani esithi ‘2030 uMnangagwa uzabe elokhu ekhona’. Abakuphikisa lokhu batshaya phansi ngenduku besithi sokumele kungene omunye esikhundleni lesi.
Forum