UMongameli Emmerson Mnangagwa usengumgcinisihlalo womanyano weSADC loba kulabantu abanengi eZimbabwe abachothoza uhulumende wakhe abathi uncindezela uzulu njalo wephula ilungelo loluntu.
Wamukele isikhundla lesi ngesikhathi kulabaphikisayo abafika ikhulu lamatshumi ayisikhombisa – 170 abavalelwe eRemand Prison abetheswa amacala okutshotshozela udlakela lokunye.
Babambe owangaphansi abanye abalandela okwenzakala eZimbabwe abathi akumangalisi ukuba inkokheli yeSADC kayikhulumanga ngohulumende kaMnangagwa okuthiwa wephula ilungelo labantu.
Esamukela isikhundla somgcinisihlalo weSADC edale lephalamende eMt. Hamden, uMnangagwa uthe uzasebenzela intuthuko yomuntu wonke ezansi yezwekazi leAfrica.
Esethula amazwi la uhulumende wakhe ubefake amasotsha lamanengi emigwaqweni eHarare esenzela ukuvimba abafuna ukutshengisela bekhonona ngokhetho olungaqhutshwanga kahle nyakenye olwachothozwa yiSADC, European Union lezinye inhlanganiso.
Amapholisa aqhubekele phambili ebopha abaphikisayo namuhla abagoqela uMnu. Prince Dubeko Sibanda owayelilunga leCitizens Coalition for Change. Ubephethe isikhundla lesi, uMongameli Joao Lourenco wakwele Angola labanye bakhe kabakhulumanga ngokwenzakala eZimbabwe.
Umbiko ojulileyo awethule enkundleni yeSADC, uLourenco uthe sibi kakhulu isimo sezomvikela eMozambique leDemocratic Republic of Congo.
IStudio 7 ayenelisanga ukukhuluma ngokwenzakala eZimbabwe labanye abakhokheli beSADC abagoqela uMongameli Cyril Ramaphosa wakwele South Africa okukhanya engani udlelana kakhulu loMnangagwa.
Omele eleZimbabwe kwele Mozambique, uMnu. Victor Matemadanda utshele iStudio 7 phandle kwendawo obekuqhutshwa khona umhlangano weSADC Summit ukuba ilizwe lakhe kalephuli ilungelo loluntu njengalokhu okukhulunywa ngabaphikisayo labanye.
Omele uBulawayo edale leSenate uMnu. Kucaca okade esemhlanganweni lo uthe bekunzima ukuba iSADC ikhulume ngokukhahlanyezwa kwelungelo loluntu eZimbabwe ngendlela udaba lolu olwabekwa ngayo ngabamabandla aphikisayo.
Kodwa okhokhela amalunga eCitizens Coaliton for Change edale lephalamende, uMnu. Sengezo Tshabangu, uthi kuyadanisa okwenzakale eZimbabwe njalo lokuba iSADC kayizange iluphathe loludaba.
UMongameli Hakainde Hichilema wakwele Zambia kubikwa ukuba kahambanga emhlanganweni lo ngoba kazwani kangako loMnangagwa labanye bakhe. UMnangagwa wake watshele umkhokheli wakwele Russia, uMnu. Vladmir Putin, ukuba uHichilema udlelana lohulumende wakwele Melika esenzela ukutshiphisa eleZimbabwe.
Umhlangano weSADC Summit uqhitshwa ngeSonto. Umgcinisihlalo weSADC ukhangela konke okwenzakala kumanyano lo okugoqela ukwethulwa kweziqondiso zombusazwe njalo lokuba abasebenzela inhlanganiso le bawuphatha njani umsebenzi wabo.
Umgcinisihlalo usebenza lewofisi kanobhala jikelele njalo kumele abone ukuthi konke kuqhutshwa ngemfanelo kumanyano lo. Ilizwe linye ngalinye liphatha isikhundla lesi okomnyaka owodwa.
Forum