UMongameli Emmerson Mnangagwa usekhethe uMnu. John Mushayavanhu ukuba abengusibalukhulu webhanga elikhulu lelizwe eleReserve Bank of Zimbabwe.
Umbiko lo wethulwe namuhla ngumphathintambo wezemali, uMnu. Mthuli Ncube, othi uMushayavanhu uqala umsebenzi wakhe namuhla njalo uzawugqiba mhlaka 27 Mbimbitho ngomnyaka ka2029.
UMushayavanhu walile ukukhuluma ngodaba lolu esithi ubambekile namuhla sixhumane laye ngolunye usuku.
UMnangagwa wenze lokhu ngesikhathi idollar leMelika lithenga amadollar eZimbabwe azinkulungwane ezingamatshumi amane - ZW$40,000 emkambo wensitha.
Kulabanye abathi uMushayavanhu kasoze ukumise ukugugudeka kwedollar lelizwe eselingasathengi lutho.
Omunye wabo nguMnu. Rejoice Ngwenya ingcwethi kwezenotho okunhlanganiso yeCommon Market for Liberal Solutions.
Siphinde saxoxa ngodaba lolu kanye lokugugudeka kwedollar leZimbabwe loMnu. Japhet Mpofu, usomabhizimusi olodumo owayelamawotela koBulawayo njalo okwamanje olepulazi elithengisa inkomo lezilimo ezitshiyeneyo ezigoqela amakhabitshi.
UMpofu uthi kunzima ukusebenza eZimbabwe ngenxa yokusilela komlilo kagesi lokunye.
Forum