Inhlanganiso yabalimi abamhophe, iCommercial Farmers Union sisole kakhulu ukuxotshwa komunye umlimi odumileyo epulazini lakhe isithi ukususwa kwabalimi abamhophe emapulazini kulakho ukubangela ukusilela kokudla ngomnyaka ozayo.
UMnu Wayne Greaves unikwe incwadi zokuthi asuke epulazini lakhe eliseBeatrice ngeviki edluleyo njalo ngoLwesibili ubephakathi kokuthutha ngoba amalanga awanikiweyo ukuthi abesesukile ephela ngoLwesithathu.
UGreaves ngumlimi olodumo ophiwe isicoco yinhlanganiso yabalima igwayi ngo1997 ngemva kokuba elime igwayi ukwedlula bonke abalimi elizweni. Ngaphandle kwegwayi ubelima umumbu, njalo efuya inkomo.
Ekhuluma leStudio 7, uMnu Greaves uthe umlimi onsundu onikwe ipulazi lakhe nguMnu Hudson Zhanda. Uthe ubesiyadinga indlu yokuhlala eHarare, njalo inkomo zakhe ezedlula amakhulu amabili ubezicelele indawo yokulaga kwelinye ipulazi lomngane wakhe.
Asenelisanga ukuzwa ukuthi uZhanda lilunga leZanu PF kumbe hatshi. Izisebenzi zikaGreaves ezingamatshumi ayithobaminwe mibili lane lazo zixotshiwe kanye lemuli zazo ezilabantu abedlula amakhulu amathathu.
Isikhulumeli seMDC ekhokhelwa nguMnu Welshman Ncube, uMnu Nhlanhla Dube uthe bayakusola kakhulu ukuxotshwa kukaGreaves epulazini kanye lezisebenzi zakhe.
