Umkhwenyana kaMongameli Robert Mugabe, uMnu. Simba Chikore, usekhethwe ukuba ngomunye wabaqondisi benkampani yendizamtshina eye Air Zimbabwe.
UMnu. Joram Gumbo, umphathintambo wezokuhambisa okutshiyeneyo eZimbabwe, utshele iStudio 7 ukuthi uChikore unqobe bonke abantu akade befuna ukuthatha isikhundla sika chief operations officer.
Uthe kungamanga ukuthi uChikore uthole isikhundla lesi ngenxa yokuthi ungumkhwenyana kaMugabe.
UGumbo uthe akulunganga ukucabanga njalo ngenxa yokuthi zingengi izihlobo zikaMongameli Mugabe loNkosikazi Grace Mugabe ezilakho ukuthola imisebenzi enjengale kumankampani kahulumende kumbe kuhulumende.
Uphinde waveza ukuthi laye uyisihlobo sika Mugabe.
Uthe abanye asebebambe izikhundla eziphezulu kunkampani ye Air Zimbabwe bagoqela uMnu. Rektin Muzenda, umtaka muyi uMnu. Simon Muzenda, owayengumsekeli kaMongameli Mugabe.
Inkampani yeAir Zimbabwe ilezikwelede ezimangalisayo okwenza ukuthi ezinye indizamtshina zayo zibanjelwe izikwelede emazweni anjenge Bhilithane leSouth Africa.