Odokotela bathi kumele abantu beqaphele umkhuhlane wobhova osubulele ababili koBulawayo.
Ophethe uhlangothi olubona ngezempilakahle edolobheni leli, uDokotela Edwin Mzingwane, uthi ababulewe ngumkhuhlane lo ngabadabuka eTsholotsho abaphuze ukuyadinga uncedo ezibhedlela. Uthi kumele abantu beqaphele umkhuhlane lo.
"Umkhuhlane lo wobhova utholakala ezinjeni, amakhanka, omangoye, labolulwane. Uthelelwana ngokuluma kumbe ukulunywa yisilwane kumbe inyamazana eyabe ilalo umkhuhlane. Ubhova lubi kakhulu okwenza ngilimukise uzulu, ngoba enyangeni ezimbili ezedlule sikesabalawo abantwaba ababili balahlekelwe yimpilo ngalo umkhuhlane. Basweleke koBulawayo kodwa ukulunywa lokugula kwabo kuqale bengaphandle kwedolobho.”
UDokotela Mzingwane uthi kuqakathekile ukuhlabisa inyamazana ezingaba lomkhuhlane wobhova.
“Umkhuhlabe lo kuqakathekile ukuhlabisa inyamazana ezibalisa izinja labokiti. Izinja ziyawumemethekisa lumkhuhlane uma zingavikelwanga ngesikhathi esufaneleyo. Umuntu othe walunywa yinja elobhova kumele athole ukuhlatshwa amajekiseni insuku ezintathu zingakadluli ngemva kokulunywa elobhova kumbe engelabhova."
Izibonakaliso zomkhuhlane wobhova zibalisa ukutshisa komzimba, ukungathi umuntu ubanjwa lufuba, ukwehluleka ukuginya, ukugxoza indenda, ukwesaba amanzi, lokunye.
Udokotela wezinyamazana uTinovonga Chemazho uthi kulesikhathi okumele kuhlatshwe izinja amajekiseni okuzivikela kumkhuhlane wobhova.
"Kusetshenziswa amajekiseni ahlukeneyo ukuvikela inja kumkhuhlane wobhova. Inja ihlatshwa ilenyanga ezintathu izelwe, iphinde ihlatshwe ileziyisithupha, isitshiyangalonye kanye lenyanga ezilitshumi lambili. Ngemva kwalokho, ngomnyaka ngomnyaka kumele ihlatshwe ingeqisi ukuze ihlale ivikelekile."
Isakhamuzi sakoBulawayo uMnu. Alez Goosen uthi izinja zakhe zihlala zivikelwe kumkhuhlane wobhova.
"Ezami izinja ngilodokotela okhona ozinakekelayo sikhathi sonke. Uyabuya ezozihlaba sizivikela kumkhuhlane wobhova leminye nje imikhuhlane. Umkhuhlane wobhova mubi kakhulu."
Ugatsha lwezempilakahle eZimbabwe luthi abantu abedlula amakhulu amane balakho ukubulawa lubhova ngomnyaka lobanje uhulumende ehamba phambili ekuvikeleni lumkhuhlane. Inhlanganiso yezempilakahle eyeWorld Health Organization ibika ukuba kuzwekazi leAfrica abantu abedlula inkulungwane ezingamatshumi amahlanu – 25,000 babulawa lubhova kuzwekazi leAfrica ngomnyaka.
Uphenyo olwenziwe lonyaka yi-Onderstepoort Journal of Veterinary Research luveza ukuba abantu abedlula amakhulu amane babulawa lubhova minyaka yonke eZimbabwe. Inhlanganiso yezempilakahle eyeWorld Health Organization ithi abantu abafika phose inkulungwane ezingamatshumi ayisithupha – 59,000 babulawa ngumkhuhlane wobhova emhlabeni wonke jikelele ngomnyaka.
Forum