Umphathintambo wogatsha lwezemali umnumnzana Patrick Chinamasa usekhuthaze osomabhizimusi bakwele South Africa ukuthi bezosungula amabhizimusi eZimbabwe. Ekhuluma emhlanganweni osanda kuqhutshwa eJohannesburg wokukhankasela ukusungulwa kwamabhizimusi eZimbabwe, uChinamasa uthe uhulumende uzimisele ukulalela izikhalazo zabafuna ukusungula amabhizimusi wathi nxa kulendingeko yokuguqula eminye imithetho yezamabhizimusi lokho kuzakwenziwa.
Umnumnzana Chinamasa utshele osomabhizimusi eJohannesburg kwele South Africa ukuthi baze ngobunengi ukuzosungula amabhizimusi eZimbabwe. Ubuye wabathembisa njalo ukuthi uhulumende uzalalela izikhalazo zabo aguqule konke okungumgoqo ekuqhutshweni kwamabhizimusi.
UChinamasa uthi manengi kakhulu amathuba okusungula amabhizimusi eZimbabwe kugoqela lohlelo lokwenza amagetsi. Ubuye wathembisa njalo ukuthi uhulumende uzaqhubeka esebenzisa imali yakwamanye amazwe athe le yinto ezakwenza abafuna ukuqala amabhizimusi babe lesiqiniseko sokuthi abasoke balahlekelwa yimali.
Ekhuluma emkhankasweni ofanayo, isiphathamandla senhlanganiso yabosomabhizimusi Zimbabwe eye Confederation of Zimbabwe Industries (CZI) umnumnzana Busisa Moyo, uthe bayathokoza ngokuthi uhulumende usethatha amanyathelo okukhankasela ukusungulwa kwamabhizimusi eZimbabwe.
Umnumnzan Moyo ukhuthaze uhulumende labamabhizimusi ukuthi babambane ekulungisiseni konke okuyimigoqo kwezokuqhutshwa kwamabhizimusi ukuze abafuna ukusungula amabhizimusi bengathandabuzi ukuza eZimbabwe. Uthi okuthokozisayo yikuthi ukudonselana obekusiba khona phakathi kukahulumende labosomabhizimusi sekuphela njalo sekulokusebenzisana.
Usomabhizimusi weZimbabwe kwele South Africa umnumnzana Conrad Mwanza, uthe balwemukela ngezandla zombili unxuso lukahulumende lokuthi bezosungula amabhizimusi. Lobanje umnumnzana Mwanza evumile ukuthi kunengi okuzafuze kulungiswe, uphinde njalo wakhuthaza izizalwane zeZimbabwe ukuthi zingagoqi izandla zimelele ukuthi uhulumende nguye ozavuzelela ezomnotho eyedwa.
Umnumnzana Moyo uthe osomabhizimusi abangene umhlangano weZimbabwe eJohannesburg, baveze isifiso sokwazi kabanzi ngamathuba akhona ekusunguleni ezamabhizimusi kunhlangothi ezibalisa ezokwethekela, ezokwenza impahla, ezemigodi, lezinye.
Kusenjalo ingcitshi kwezomnotho zithi kuzabanzima ukuthi osomabhizimusi basungule inhlelo zabo eZimbabwe ngesikhathi kulombango wezikhundla owesabekayo ebandleni le Zanu pf. Bathi inengi labafuna ukusungua amabhizimusi eZimbabwe bazakwenza izinqumo nxa ibandla leZanu pf selilungisile ingxabangxoza ekhona ngodaba lokuthi ngubani ozasala ephethe intambo zombuso nxa umongameli Mugabe engasekho esikhundleni.