Ngesikhathi inhlanganiso yamazwe angezansi kwe Africa, iSADC ichazwa njengelamazinyo, inyathelo elithethwe ngumongameli Ian Khama ngodaba lokungahlaliseki kwezombusazwe eLesotho selilethe inhlansi ngitsho lakwabeZimbabwe ukuthi lenhlanganiso ilawo amandla okujezisa amalunga aphuma endleleni.
Amalunga aweSADC Double Troika agoqela iBotswana, Tanzania, Swaziland kanye leZimbabwe kade ebuthanise amakhanda eGaborone mhla ziku18 Zibandlela ukuxazulula udaba lengxaki yezombusazwe eLesotho.
Inengi belithatha lomhlangano, owenzelwe eGaborone, njengesinye isikhathi esichithwa kungelandima ebonakalayo.
Kodwa ngaphansi kukamongameli Ian Khama ongumgcinisihlalo weSADC, ngemva kokuthatha isikhundla kumongameli Robert Mugabe nyakenye, inhlanganiso le kukhanya isithole amazinyo okuluma.
Inkokheli yeLesotho, ngemva kokubulawa kwalowo owayekhokhela ibutho, uMapharankoe Mahao, yazama ukudlala umacatshelana lenkokheli yeSADC.
Kodwa umongameli Khama kazange achithe isikhathi ebatshela ukuthi bangazimangalisi ngoba bazazithola belahlelwe ngaphandle kwalenhlanganiso, okusekelwe ngamanye amalunga aweDouble Troika. Lokhu kutshiye inengi limangele ngoba kungasiyo iSADC abayijwayeleyo.
AbeZimbabwe eBotswana abalandele lomhlangano bathi balethemba lokuthi iSADC isivuse umhlonga ilindele ukuthatha inyathela kumalunga aphambanisayo.
Umnumzana Joel Mguni uthi umongameli Khama uyenze okungajayelekanga njalo ulethe ithemba ukuthi laloba kuyiZimbabwe ephambanisa izinqumo zeSADC, inyathela lizathathwa.
Bekulokukhonona ngesikhathi iZimbabwe isegudwini ngenxa yezombusazwe lapho iSADC ikhanye isehluleka ukuthatha inyathela ikakhulu ngomongameli Robert Mugabe.
Kodwa umnumzana Tendai Dzirutwe uthi sebebona iSADC entshintshayo ngaphansi kukamongameli Khama ethi bafisa ukubona lokhu kuqhubeka.
Kukanti umnumzana Providence Sibanda uthi abantu bangabe bethabe masinya ngoba ubugcinisihlalo bukamongameli Khama buzadlula ngemva komnyaka okungabona iSADC ilahlekelwa njalo ngamazinyo ayo.
Umnumzana Mxolisi Mpofu uthi kumele kunanzelelwe ukuthi imbali yeSADC yiyo eyenza ibe yinja engalumiyo, njalo inkokheli entsha efana leka mongameli Khama izama ukuqamula amaketane amadala.
Umongameli Khama uyahlonitshwa ngendlela ayenelisa ukubiza ifosholo njenge fosholo, njalo kakaze atshedele emuva uma efuna ukuchothoza inkokheli kamongameli Mugabe.
Inengi lithi uma le iyikusasa yeSADC ikahle, ngesikhathi iZimbabwe ilungiselela ukhetho lomnyaka ka2018 olukhangelelwe ukuletha ingxaki ezingafana lodlakela kanye lokulandela imthetho yokubamba ukhetho eyafakwa yiSADC.