Umeli omutsha weMelika eZimbabwe, uNkosikazi Pamela Marie Tremont, uthi ilizwe lakhe lizaqhubeka lincedisa usapho lweZimbabwe ukuthi luphile impilo engcono ngoncedo oluvela elizweni lakhe.
Kodwa uhulumende weZimbabwe uthi ukuze ilizwe lakhe lithuthuke, umlandu omkhulu ukuzizalwane zakhe, hatshi uncedo oluvela kwamanye amazwe. Ekhuluma lentathelizindaba eseState House eHarare namuhla, ngemva kokunikeza amaphepha akhe okusebenza
ngokusemthethweni njengomeli welizwe leMelika, uNkosikazi Tremont wazise ukuba ilizwe lakhe selanika eleZimbabwe uncedo lwemali eyedlula amabhiliyoni amahlanu amadola eMelika, eyokuthuthukisa ingatsha ezehlukeneyo, njalo loluncedo luzaqhubekela phambili.
“Njengelizwe leMelika, siqhubekela phambili sinceda izizalwane zeZimbabwe ukuthi zibe lombuso wentandokazulu kanye lokuthi benelise ukuzithuthukisa. Sinceda njalo kwezomnotho ngendlela ezitshiyeneyo. Ensukwini ezilandelayo, kuloncedo olukhulu esizalusungula, ukuthi sisize inkulungwane zabantu esikhangelane lendlala kuleli.”
UNkosikazi Tremont usole kakhulu ukudutshulwa kowake waba ngumongameli weMelika, uMnu. Donald Trump, ngoMgqibelo odluleyo.
“Siyakusola okuzwayo, okwenzakala kuMnumzana Trump. Ilizwe leMelika kalilandawo yodlakela. Sithi phansi ngodlakela emazweni wonke omhlaba.”
Wazise njalo ukuba isigodlo seMelika sizazisa uzulu ngohlelo esifuna ukulusungula kumalanga amalutshwana alandelayo, lokusiza izigidi zabantu ezikhangelane lendlala eZimbabwe.
Kodwa lanxa eleMelika lithembisa ukuncedisa ngendlela ezitshiyeneyo kwezomnotho kanye lezokubusa ngentando kazulu, unobhala wogatsha olubona ngokwethulwa kwemibiko, uMnu. Nick Mangwana, uthi izizalwane zeZimbabwe yizo ezingathuthukisa ilizwe lazo.
“Ubudlelwano bethu buhle kakhulu, kodwa okumqotho yikuthi sibe kwazi ukuthi eleZimbabwe lakhiwa yithi abanikazi balo. Amanye amazwe angabuya ukuzonceda nje, kodwa thina abakuleli yithi okufanele sisebenzele, sibuse, njalo silhulekele ilizwe lethu. Lokhu yikho okumunyethwe kuVision 2030.”
Amazwi kaMnu. Mangwana agcwalisisa okutshiwo ngocubungula indaba zobudlelwano bamazwe omhlaba, njalo esebenza kunhlanganiso eyeZimbabwe Democracy Institute, uMnu. Bekezela Gumbo.
“Ukuza komeli omutsha weMelika lapha akusoze kutshintshe indlela amazwe omabili kade ehambisana ngayo, ngoba lo ngumeli kuphela, akenelisi ukutshintsha imithetho yelizwe lakhe mahlayana. Ukuze ubudlelwano lobu butshelele, kufuna ukuthi eleZimbabwe lidonse nzima, litshintshe indlela eliqhuba ngayo izinto. Lapha ngikhuluma ngendaba zokhekho, ubugwele-gwele, amalungelo oluntu lokunye. Kodwa leleMelika kumele lalo liguqule imithetho yabo, engangokuthi ifuna ukuthi umuntu wonke ayenze lokho abakufunayo bona.”
Uhulumende weZimbabwe loweMelika, ujikelana aqatha zikhathi zonke, ngenxa yezijeziso ezabekwa ngeleMelika, kwezinye iziphathamandla ezibalisa uMnangagwa, zisetheswa amacala owokungalandeli isisekelo sombuso lamalungelo oluntu. Kodwa uhulumende weZimbabwe uthi inyathelo lokuthathela amamhlophe amapulazi, kunikwa abamnyama, alithatha ngomnyaka ka2000, yilo elazondisa eleMelika.
Lanxa kunjalo, uMnu. Elton Ziki, umqondisi wenhlanganiso eyeThe African Cause Trust, uthi azesulwe zonke lezi izijeziso.
“Yebo siyakwazi ukuthi ezinye lezi zijeziso zakhitshwa nyakenye, kodwa nxa umongameli welizwe lethu esasekhona, askukhanyi ukuthi eleMelika liyafuna ngempela ukuthi sisebenze ndawonye okwamaqisino. Ithemba ngelokuthi lowu meli weMelika lapha, uzasebenza gadalala ukuze lezi zijeziso zikhitshwe ngoba kazikho emthethweni. Ilizwe lethu kalifuni kuxabana, kodwa lifuna ukumanyana lamanye amazwe omhlaba, njengokutshona kutshiwa ngumongameli Mnangagwa.”
UNkosikazi Jacqueline Sande, igqwetha, njalo ecubungula indaba zombusazwe, uthi uhulumende kumele azehlise, adinge zonke indlela ezingenza ukuthi eleZimbabwe libe lobudlelwano obuhle leleMelika.
“Siyakwazi ukuba uhulundende kaMongameli Mnangagwa kulezinsuku uthanda kakhulu ukudlelana lamazwe anjengeRussia leChina. Kodwa kubalulekile ukuthi adinge indlela zokudlelana leleMelika ngendlela efanayo. Akumelanga azingenise empini zamazwe lawa, ngoba lokhu kubulala ilizwe lethu. Ukubona ndawonye lelizwe elinjengeleMelika kulakho ukuletha izithelo ezimnandi kwelakithi.”
Ezinye ingcwethi ezicubungula ezobudlelwano bamazwe omhlaba zithi lanxa amazwe la womabili - eleZimbabwe leleMelika, ethethisana, ayafuna ukusebenza ndawonye ngoba elazo inzuzo azitholayo ezilethwa yibudlelwano lobu.
UNkosikazi Tremont ukhangelelwe ukuba uzakhuluma njalo lentathelizindaba kusasa eHarare.
Forum