Uyakhala umdeni wenduna uMarupi othi kumele kuhlolisiswe indlela umkhokheli wabo atshone ngayo eHarare.
Imuli yakoMarupi ithi kukhona okunuka santungwana ngokutshona kwendodana yabo ebinxuswe ukuyakwelatshwa ngemva kokutshaywa likhanda okungapheliyo.
UMnu. Gerald Mlotshwa, umkhwenyana kaMongameli Emmerson Mnangagwa onguye owanxusa induna uMarupi ukuba ahambe esibhedlela eHarare ubesengcwabweni wenduna eSelonga lapho afike khona ngendizamtshina yohlobo lwehelicopter.
Umdeni wenduna uthi kuyabamangalisa lokhu njalo bamadolonzima ngokutshona kwenduna. Umalume wenduna etshonileyo, uKgwatalala oweMawaza, uthi kulesandla semfene ekutshoneni komzukulu wakhe. Uthi ukubhubha kwakhe esanda kutshontshelwa imota abeyiphiwe ngumongameli kuveza obala ukuthi kukhona okunuka santungwana. Ekhuluma emzini kaMarupi lapho afihlwa khona izolo, uKgwatalala uthe lowo owenze lokhu uzajeziswa.
“Mina ngedwa ngiyasola, bangaki abangasoliyo, angitshongo ukuthi liphakamise izandla kodwa asikhulumeni enhlinziweni zethu njengami, kambe umzukulu wami emncane kangaka athathe imota lamuhla sethethe umphefumulo wakhe, aliboni ukuthi yinto yinye, esintwini ngithi yisenzo somuntu, esintwini umzila lo othi ngiyawudweba kasasoze aweqe, angifungi, ithi ngingakhulumi kakhulu omunye ngingacina ngimhlukuluze inhliziyo.”
Umngane wenduna etshonileyo, induna uTshitaudze oweBeitbridge, uthi laye kazwisisi indlela omunye wakhe ahambe ngayo.
“UChief Marupi besazana kakhulu njalo kubo 20 ngelanga leholo uyabe efona, ‘Bafo singenile yini besengisithi hayi bafo kangikabi kwazi mana ngikhangele ukuthi kulemalin. Sebuza ama USA ‘yimalini’. Ngumuntu obehlala ethabile njalo bengingaze ngimbone ezondo kakhulu, lokufa kwakhe akukholeki lakHathesi, indaba zakhona kazihlangani.”
Inkokheli yezinduna uMtshane Khumalo uthi kubadanisile ukudlula kukaMarupi njalo ukhuthaze imuli eseleyo ukuthi ingabangi ubuduna.
“Sithe sisakhangele ukuthi ngumuntu othathelwe imota khona sizabuya sizomkhulumisa sasesisizwa umkhosi wonalo esihlangene ngayo lamhlanje , siyathemba bakoMarupi, ukuthi alizi ukulilingise abanengi abathi kungadlula induna kuqalise imkhankaso ezathatha iminyaka ethize ukuze abantu baphume lomuntu abamfunayo.”
UMnu Gerald Mlotshwa, onguye owanxusa induna uMarupi eHarare ukuyakwelatshwa imuli yakhe ingazi lutho, uthi ngokubona kwakhe induna iphuzile ukuthola uncedo esibhedlala. UMlotshwa ngomunye walabo abafuna ipilazi leDoddiburn Ranch elisezandleni zeGwanda Rural District Council.
“Nxa sucubungula kuvela obala ukuthi uncedo lokwelatshwa luphuzile ,lizwile Induna engumngane wakhe isithi kunyanga ezintathu ezidlulileyo ebelalisisiwe esibhedlela engezwa kahle, ngibona ngalesosikhathi kukhona okukhulu obekumele kwenzakala,ukungenela kwami kuphuzile, isimanga yikuthi angikaze ngihlangane laye uChief, angikaze ngihlangane laye njalo kuyangidanisa lokhu.”
Induna uMarupi obeleminyaka yokuzalwa engamatshui amabili lasitshiyangalombili - 28 utshiye umkakhe.
Amapholisa athi ahlolisisa ukubhubha kwakhe njalo azakwethula kusikhatshana okuveza ukuba ubulewe yini.
Forum