Umculi olodumo odabuka eZimbabwe, uDorothy Masuka, kasekho.
Isikhulumeli somdeni wakhe, uFortune Hute, uthe uMasuka ubephila lomkhuhlane weHigh Blood Pressure omenze waba lestroke.
“Umkhuhlane lo ubumthwalise nzima. Kwaqala ngoNhlangula nyakenye. Silokhu sithithibele ngokubhubha kwakhe. Loba kunjalo sithakazelela impilo yakhe lakwenzela abantu jikelele. Asikathathi isinqumo sokuthi uzangcwatshwa ngaphi.”
UHute uthe umuyi wayelwela ilungelo loluntu. “Ubhubhe okuhambelana leminyaka yakhe yokuzalwa. Ubeseleminyaka engamatshumi ayisitshiyangalombili lane (84) lonyaka. Ubelwela uzulu ikakhulu abantu abansundu. Wayesitshela sonke isikhathi ukuthi kumele siziphathe kahle njengabantu abansundu.”
Akwaziwa ukuthi uzangcwatshwa ngaphi njengomuntu wazalelwa koBulawayo.
Ingoma yakhe ethi Dr. Malan yavinjwa nguhulumende wenkethabetshabi kwele South Africa.
Ingoma le yayichothoza uhlelo lobandlululo olwaphawulwa ngomnyaka ka1948 nguhulumende kaMalan.
Ezinye ingoma zakhe zigoqela ezithi El Yow (Phatha Phatha), MaGumede, Nhinkirikiri, Dr. Malan, Khawuleza lethi Chimanga.
Ulengoma ezinengi okumangalisayo njalo usanda kwethula idlalade okukhangelelwe ukuthi lizathakazelelwa nguzulu.