Umbukiso omkhulu wezokwethekelelana owe Sanganai /Hlanganani usungule ulababukisayo abakumsebenzi wokwethekelelana abavela emazweni amanengi womhlaba ngenhloso yokusebenzelana lokubonisana ngamacebo okuthuthukisa ezokwethekelelwa kwamazwe abo.
Lumbukiso owenziwa kanye ngomnyaka ovule amasango ehwetheleni yeRainbow Towers eHarare ngoLwesine ungenwa ngabenhlanganiso kunye labamabhizimusi aphatheka kwezokwethekelelana akuleli lavela ngaphandle kwelizwe.
Ele zansi ye Africa elivame ukuphatheka ngendlela enkulu kulamanye amazwe awezwekazi le Africa libuye lengezelele indawo ye Mpumalanga okwakuqala kulumbukiso ngokutsho kuka Nkosazana Nomcebo Sibande we Mpumalanga Tourism Agency. Uthi lindawo ilezinyamazane eKruger National Park iphinde ibe lezintaba kunye lezifudlana ezinengi okungajabulisa izethekeli.
Isabelo se Limpopo sona sitshengisa amasiko abantu baso e Vembe. Unkosikazi Rudo Mucharambeyi uthi lindawo ilokunengi okuhuga izethekeli ezivela endaweni ezitshiyeneyo zelizwe lemhlabeni jikelele. Uthi ukusebenzelana ndawonye kwamabhizimusi ezansi ye Africa kulumbukiso kuzaphathisa amazwe womabiliukuba ethuthuke kwezomnotho lakumisebenzi yokuvakatshelana.
Ele Zimbabwe likhuthaza izizalwane zalo ukuba zithathe isikhathi lazo sokuhlaba ikhefu zethekelele indawo ezehlukeneyo zelizwe ngoba inengi labantu kuleli likhanya lingazihluphi ngaloludaba.
Ugatsha lokugcinwa kwembali yesizwe lubukisa amasiko akuleli kunye lokuqakatheka kukugcinwa lokulondolozwa kwezemvelo.
Lumbukiso ungenwa ngabathengi abedlula abangamatshumi atshiyangalombili kunye lababukisi abavela emazweni ahlanganisela I China, United Kingdom, Italy, France, Germany Kenya,le South Africa.